Мубодилаи барқияҳои табрикии Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Ҳиндустон Рам Натх Ковинд
ДУШАНБЕ, 28.08.2017. /АМИТ «Ховар»/. Имрӯз миёни Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ҳиндустон Рам Натх Ковинд ба муносибати 25-умин солгарди барпо намудани робитаҳои дипломатии ду кишвар мубодилаи барқияҳои табрикӣ ба амал омад.
Ҳамин тавр, дар барқияи табрикии Президенти Ҷумҳурии Тоҷикистон муҳтарам Эмомалӣ Раҳмон ба унвони Президенти Ҷумҳурии Ҳиндустон Рам Натх Ковинд, аз ҷумла, омадааст:
«Ҷаноби Олӣ,
Бо камоли хушнудӣ Шуморо бо фарорасии санаи муборак дар таърихи муосири муносиботи Ҷумҳурии Тоҷикистон ва Ҷумҳурии Ҳиндустон – 25-умин солгарди барпо намудани робитаҳои дипломатӣ байни кишварҳоямон самимона табрик менамоям.
Боиси қаноатмандист, ки тайи ин солҳо ҳар ду ҷониб заминаи боэътимоди қарордодиву ҳуқуқии муносибатҳои анъанавии дӯстона ва ҳамкориҳои судмандашонро дар соҳаҳои мухталифи мавриди таваҷҷуҳи тарафайн эҷод намуда, бо талошҳои фаъолу созанда онҳоро пайгирона густариш додаанд.
Мо итминон дорем, ки идомаи бемайлони ин раванд ҷавобгӯйи манфиатҳои миллӣ ва ормонҳои мардумони ду кишвари дӯст мебошад.
Зимнан ҷониби Тоҷикистон омода аст, ки баҳри рушду такомули минбаъдаи ҳамшарикии гуногунҷанбаи ду кишвар саъю кӯшишҳои зарурӣ ба харҷ диҳад.
Ба Ҷаноби Олӣ сиҳатмандии комилу комёбиҳо ва ба мардуми дӯсти Ҳиндустон сулҳу субот ва рӯзгори ободу пешрафти беш аз пеш орзумандам».
Дар барқияи табрикии Президенти Ҷумҳурии Ҳиндустон Рам Натх Ковинд ба унвони Президенти Ҷумҳурии Тоҷикистон Эмомалӣ Раҳмон чунин гуфта шудааст:
«Ҷаноби муҳтарам,
Бо хушнудии зиёд Шумо, Ҷаноби Олӣ ва мардуми дӯсти Тоҷикистонро ба муносибати 25-солагии таъсисёбии муносибатҳои дипломатӣ байни Ҷумҳурии Тоҷикистон ва Ҷумҳурии Ҳиндустон, ки рӯзи 28 августи соли 2017 таҷлил мегардад, табрик менамоям.
Муносибатҳои байни Ҳиндустон ва Тоҷикистон аз рӯи таърих, забон, анъана ва фарҳанги муштарак реша давондаанд. Бинобар ин, бамаврид аст, ки кишварҳои мо бо шарикии стратегӣ ва дар асоси ҳадафҳои умумии амният ва шукуфоии ду кишвар ва минтақа бо ҳам пайванданд. Боздиди Шумо, Ҷаноби Олӣ ба Ҳиндустон, ки моҳи декабри соли 2016 сурат гирифт, саҳифаи навро дар муносибатҳои ду кишвар кушода, ба таҳкими равобити дуҷонибаи мо умед мебахшад.
Лутфан табрики маро бо таманнои саломатии хубу бардавом ва хушбахтӣ ба Шумо, Ҷаноби Олӣ қабул доред.
Ҷаноби муҳтарам, фурсатро ҷиҳати изҳори ғояти эҳтироми худ ба шумо ғанимат медонам».
Президенти Ҷумҳурии Тоҷикистон Эмомалӣ Раҳмон бо рафти корҳои сохтмонӣ дар бинои Театри миллӣ шинос шуданд
Президенти Ҷумҳурии Тоҷикистон Эмомалӣ Раҳмон доир ба рафти омодагиҳо ба таҷлили ҷашни 35-солагии Истиқлоли давлатии Ҷумҳурии Тоҷикистон машварати корӣ доир намуданд
Фармони Президенти Ҷумҳурии Тоҷикистон
Пешвои миллат Эмомалӣ Раҳмон дар шаҳри Исфара ба таври фосилавӣ як қатор иншооти иҷтимоиро мавриди истифода қарор доданд
Президенти Ҷумҳурии Тоҷикистон Эмомалӣ Раҳмон дар шаҳри Исфара кони ангишти №8-и Ҷамъияти саҳомии кушодаи «Ангишт»-ро ба истифода доданд
Сарвари давлат Эмомалӣ Раҳмон дар шаҳри Исфара бо лоиҳаи азхудкунии заминҳои бекорхобида, пойгоҳи обкашӣ, сардхона, коргоҳи бастубанди мева ва хоҷагии чорводорӣ ба таври фосилавӣ шинос шуданд
Пешвои миллат Эмомалӣ Раҳмон бо сафари корӣ ба шаҳри Исфара ташриф оварданд
Суханронии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар чорабинӣ бахшида ба таҷлили Наврӯзи байналмилалӣ дар ноҳияи Мастчоҳи вилояти Суғд
Сарвари давлат Эмомалӣ Раҳмон бинои нави Беморхонаи марказии ноҳияи Мастчоҳро ба истифода доданд
Пешвои миллат Эмомалӣ Раҳмон дар ноҳияи Мастчоҳ ба маъракаи кишти пахта дар заминҳои хоҷагии деҳқонии «Мирхонд» оғоз бахшиданд
Президенти Ҷумҳурии Тоҷикистон Эмомалӣ Раҳмон дар ноҳияи Мастчоҳ 3 иншооти истеҳсолиро ба таври фосилавӣ ифтитоҳ намуданд
