Дар Иҷлосияи дуюми Форуми иқтисод ва ҳамкории арабӣ намояндагони 26 кишвари арабӣ, Осиёи Марказӣ ва Озарбойҷон иштирок доранд

Октябрь 16, 2017 11:14

ДУШАНБЕ, 16.10.2017. /АМИТ «Ховар»/. Ин  лаҳзаҳо дар шаҳри Душанбе бо иштироки Президенти Ҷумҳурии Тоҷикистон Эмомалӣ Раҳмон Иҷлосияи дуюми Форуми иқтисод ва ҳамкории арабӣ бо кишварҳои Осиёи Марказӣ ва Ҷумҳурии Озарбойҷон ҷараён дорад.

Иҷлосияро Вазири корҳои хориҷии Ҷумҳурии Тоҷикистон Сироҷидин Аслов  ифтитоҳ намуда, зикр кард, ки дар ин ҳамоиши сатҳи баланд намояндагони 26 кишвари арабӣ, Осиёи Марказӣ ва Озарбойҷон иштирок доранд.

Сипас, Президенти Ҷумҳурии Тоҷикистон муҳтарам Эмомалӣ Раҳмон сухан карда, ташрифи меҳмононро ба сарзамини бостонии тоҷикон хайрамакдам гуфта,  ба кори он барор орзу карданд.

Пешвои миллат  муҳтарам Эмомалӣ Раҳмон  таъсис ёфтани Форумро ба ҳайси воситаи муҳими ҳамкорӣ ва икдоми дорои аҳамияти хосса шуморида, изҳор намуданд, ки ҳамоиши навбатии Форуми навтаъсис  бори нахуст дар Осиёи Марказӣ, ки дар гузашта бо номи Мовароуннаҳр машҳур буд, баргузор мегардад.

Зикр гардид, ки дар ин сарзамини бостонӣ равандҳои муҳиме шакл гирифтаанд, ки онҳо минбаъд ба пешрафти тамаддуни исломӣ ва густариши робитаҳои илмию фарҳангӣ ва тиҷоратӣ байни минтақаҳои мухталиф мусоид намудаанд.

Бино ба андешаи Пешвои миллат, имрӯз фарҳангу тамаддуни исломиро бидуни зикри номҳои Абуалӣ ибни Сино, Абунасри Форобӣ, Абурайҳони Берунӣ, Муҳаммади Хоразмӣ ва даҳҳо нафари дигар наметавон тасаввур кард, чунки ин фарзандони фарзонаи Мовароуннаҳр дар пешрафти илми ҷаҳонӣ саҳми босазо гузоштаанд.

Дар робита ба ин Сарвари давлати тоҷикон изҳори боварӣ намуданд, ки кори форум ба эҳёи он пайвандҳо, густариши муносибатҳо ва ҳамкорӣ дар арсаҳои гуногун мусоидат карда, барои пешрафти минтақаву кишварҳои мо заминаи мусоид фароҳам хоҳад овард.

Ёдовар мешавем, ки иҷлосияи якуми Форуми иқтисод ва ҳамкории арабӣ бо кишварҳои Осиёи Марказӣ ва Ҷумҳурии Озарбойҷон дар шаҳри Риёзи Арабистони Саудӣ 14 майи соли 2014 таҳти шиори «Дурнамои сармоягузорӣ ва табодули тиҷорӣ» дар сатҳи вазирони корҳои хориҷӣ, дороӣ ва иқтисод баргузор шуда буд. Дар он иҷлосия Эъломияи Риёз ба сифати санади поёнӣ қабул гардида, Ёддошти тафоҳуми ҳамкорӣ байни Иттиҳодияи Давлатҳои Арабӣ ва кишварҳои Осиёи Марказӣ ба имзо расид.

Мувофиқи моддаи якуми Ёддошти тафоҳуми ҳамкорӣ байни Иттиҳодияи Давлатҳои Арабӣ ва кишварҳои Осиёи Марказӣ, ҳадафи Форум густариши муносибатҳо ва таҳкими ҳамкорӣ байни кишварҳои узви Иттиҳодияи Давлатҳои Арабӣ, кишварҳои Осиёи Марказӣ ва Ҷумҳурии Озарбойҷон дар соҳаҳои гуногуни мавриди эҳтимоми муштарак мебошад, ки ба ҳифзи амнияту суботи минтақавӣ ва байналмилалӣ мусоидат мекунад. Тарафҳои Ёддошт ба манзури таъмини амну субот дар минтақаи арабӣ ва кишварҳои Осиёи Марказиву Озарбойҷон масъалаҳои ҷорӣ ва ояндаро аз тариқи ройзанӣ, ҳамкорӣ ва ҳамоҳангсозӣ ҳал мекунанд. Гузашта аз ин, таъмини рафоҳи иҷтимоӣ ва иқтисодии халқҳои онҳо аз тариқи густариши тиҷорат, табодули тиҷорӣ, сармоягузорӣ ва таъсиси корхонаҳои муштарак ҳадафи дигари Форум эълон шудааст. Сиёсат, иқтисод, иҷтимоиёту фарҳанг, мувофиқи моддаи дуюми Ёддошти тафоҳуми ҳамкорӣ  соҳаҳои ҳамкорӣ эълон шудаанд.

Дар Риёз ҳайати Тоҷикистон пешниҳод карда буд, ки иҷлосияи навбатии Форуми мазкур дар Душанбе баргузор гардад.

Хотиррасон мекунем, ки дирӯз дар остонаи Иҷлосияи дуюми Форуми иқтисод ва ҳамкории арабӣ бо кишварҳои Осиёи Марказӣ ва Ҷумҳурии Озарбойҷон дар Душанбе нишасти коршиносони аршади давлатҳои арабӣ, Осиёи Марказӣ ва Ҷумҳурии Озарбойҷон баргузор гардид.

Октябрь 16, 2017 11:14

Хабарҳои дигари ин бахш

Дар Душанбе ҷаласаи муштараки Платформаи миллии коҳиши хатари офатҳои табиӣ баргузор шуд
Дар Суғд саҳми шуроҳои ҷамъиятиро дар амалишавии ислоҳоти милитсия баррасӣ намуданд
Имрӯз дар Тоҷикистон ҳаво то 38 дараҷа гарм мешавад
СОЛИ МАЪРИФАТИ ҲУҚУҚӢ. Роҳбарияти Раёсати Вазорати корҳои дохилӣ дар вилояти Хатлон бо фаъолзанони шаҳри Кӯлоб вохӯрӣ намуд
23 июл Анҷумани ғайринавбатии Ҳизби сотсиалистии Тоҷикистон доир мешавад
20 июл Анҷумани ғайринавбатии Ҳизби ислоҳоти иқтисодии Тоҷикистон баргузор мегардад
Имрӯз дар Тоҷикистон ҳавои тағйирёбандаи бебориш пешгӯӣ мешавад
ТАҚВИМИ АМИТ «ХОВАР»: имрӯз 16 июл, сешанбе, 198-умин рӯзи соли 2024 аст
Вазорати нақлиёт дар доираи иҷрои «Барномаи давлатии кабудизоркунии Ҷумҳурии Тоҷикистон барои давраи то соли 2040» 5 миллион бех ниҳол мешинонад
Ширкати «China Datang» дар вилояти Суғд неругоҳи офтобӣ бо қувваи 500 мегават месозад
Роҳи оҳани Спитамен-Истаравшан ва Спитамен-Истиқлол бунёд мегардад
Намояндаи Осорхонаи миллӣ дар ҳамоиши «Долонҳои мероси Роҳи Абрешим дар Осиёи Марказӣ» дар Остона иштирок намуд