ФУТБОЛ: «Кӯктош» ғолиби Чемпионати Тоҷикистон байни дастаҳои лигаи якум гардид

ДУШАНБЕ, 12.10.2017 /АМИТ «Ховар»/. Дирӯз  дастаи «Кӯктош» -и ноҳияи Рӯдакӣ баъди ғалабаи калон бар дастаи «Локомотив-Помир»-и Душанбе  бо натиҷаи 7:0 як давр пеш аз анҷоми мусобиқа бори аввал дар таърихи худ ғолиби Чемпионати мамлакат байни дастаҳои лигаи якум гардид.  Тибқи низомномаи ФФТ, дастаи «Кӯктош»  ҳуқуқ пайдо кард, ки соли оянда дар қатори дастаҳои лигаи олӣ ҳунарнамоӣ кунад.

То анҷоми мусобиқа дар лигаи якум як даври дигар боқӣ мондааст. Дастаҳои «Эсхата»-и Хуҷанд, «Сомон»-и Данғара ва «Ваҳдат»-и Ваҳдат муборизаро барои ҷойҳои ифтихории 2-юм ва 3-юм то даври охирин, ки 18 октябр гузаронида мешавад, идома медиҳанд.

Имрӯз «Ваҳдат» дар майдони худ бо «Эсхата» ва «Парвоз» бо «Сомон» бо ҳам қувва меозмоянд.