Муовини раиси шаҳри Ваҳдат бо гумони қаллобӣ боздошт гардид

ДУШАНБЕ, 02.10.2017 /АМИТ «Ховар»/. Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошти муовини раиси шаҳри Ваҳдат оид ба саноат ва сохтмон  Акобирзода Рустам Алӣ хабар дод, ки бо сӯиистифода аз мансаб ба қаллобӣ роҳ додааст.

Тавре ба АМИТ «Ховар» аз Агентии мазкур хабар доданд, шаҳрванд  «А» ба Агентӣ бо ариза муроҷиат намуд, ки нисбат ба муовини раиси шаҳри Ваҳдат оид ба саноат ва сохтмон Акобирзода Рустам Алӣ тадбирҳои қонунӣ андешида шаванд. Зеро номбурда аз ў барои ҷудо намудани қитъаи замин аз маҳаллаи 20-уми шаҳри Ваҳдат 60 000 (шаст ҳазор) сомонӣ талаб карда гирифта, ягон амалро ба манфиати ӯ иҷро накардааст.

Ба иттилои манбаъ, зимни санҷиши ариза муайян карда шуд, ки Акобирзода Рустам Алӣ ҳамчунин аз шаҳрванд С. Шаропов низ маблағи 80 000 (ҳаштод ҳазор) сомонӣ гирифта, ваъда додааст, ки аз маҳаллаи 20-уми шаҳри Ваҳдат дар масоҳати 0,06 га қитъаи замин ҷудо ва ҳуҷҷатгузорӣ карда медиҳад. Вале Акобирзода Рустам Алӣ  маблағҳои аз шаҳрвандон гирифтаашро тасарруф намуда, ба манфиати худ сарф намудааст. Ӯ ба манфиати шаҳрвандон ягон амалро иҷро накарда, бо кирдорҳои ҷинояткоронааш ба шаҳрвандон ба миқдори махсусан калон зарари моддӣ расонидааст.

«Барои кирдорҳои ҷинояткоронаи содирнамудааш нисбат ба Акобирзода Рустам Алӣ бо моддаи 247 қисми 4 банди «б» парвандаи ҷиноятӣ оғоз карда шуда, тафтиши пешакии он идома дорад»,-зикр намуд манбаъ.