Мубодилаи барқияҳои табрикии Президенти Ҷумҳурии Тоҷикистон Эмомалӣ Раҳмон ва Президенти Конфедератсияи Швейтсария Дорис Лойтҳард

Декабрь 9, 2017 08:00

ДУШАНБЕ, 09.12.2017 /АМИТ «Ховар»/. Имрӯз миёни Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Конфедератсияи Швейтсария Дорис Лойтҳард ба муносибати 25-умин солгарди барпо намудани робитаҳои дипломатии ду кишвар мубодилаи барқияҳои табрикӣ ба амал омад.

Ҳамин тавр, дар барқияи табрикии Президенти Ҷумҳурии Тоҷикистон муҳтарам Эмомалӣ Раҳмон ба унвони Президенти Конфедератсияи Швейтсария Дорис Лойтҳард, аз ҷумла, омадааст:

«Хонуми Олиҷоҳ,

Сарфарозам Шуморо ба муносибати 25-мин солгарди барпо намудани робитаҳои дипломатӣ байни Ҷумҳурии Тоҷикистон ва Конфедератсияи Швейтсария самимона табрику таҳният гӯям.

Боиси қаноатмандист, ки тайи давраи сипаришуда байни кишварҳои ба ҳам дӯсти мо дар пояи ҳусни тафоҳум, баробарҳуқуқӣ ва эҳтироми ҳамдигар муносиботи ҳамкориҳои дар воқеъ ҳам ҳасанаи байнидавлатӣ ташаккул ёфта, хислати рушди зина ба зинаро касб кардаанд ва имрӯз дар марҳалаи тавсеаи минбаъдаи худ қарор доранд.

Мо кишвари Швейтсарияро шарики боэътимод ва муҳими худ дар арсаи байналмилалӣ дониста, аз дастгириву мусоидати пайвастаи ҳукумати он дар таҳкими пояҳои соҳибихтиёрии давлати Тоҷикистон сидқан сипосгузорем.

Ҷониби Тоҷикистон густариши бемайлони ҳамкориҳои гуногунарсаи судманди худро бо Швейтсария ҷавобгӯ ба манфиатҳои олии хеш медонад ва мо ҳамеша омодаем, ки баҳри таҳкими минбаъдаи онҳо дар ҳамаи сатҳҳо саъйю талошҳои зарурӣ ба харҷ диҳем.

Бо истифода аз ин фурсати фараҳбахш ба Хонуми Олиҷоҳ сиҳатии комилу саодатмандӣ ва пирӯзиҳои навин, ба мардуми дӯсти Швейтсария  хушрӯзиҳои минбаъда ва пешрафту шукуфоӣ хоҳонам».

Дар барқияи табрикии Президенти Конфедератсияи Швейтсария Дорис Лойтҳард ба унвони Президенти Ҷумҳурии Тоҷикистон Эмомалӣ Раҳмон, чунин гуфта шудааст:

«Ҷаноби Олӣ,

Ба муносибати 25-умин солгарди муносибатҳои расмии Ҷумҳурии Тоҷикистон ва Конфедератсияи Швейтсария, мехоҳам барои робитаҳои дӯстии босубот байни халқҳоямон изҳори сипос кунам.

Дар баробари рушди мусбии робитаҳои дуҷониба дар 25 соли сипаригардида мехоҳам ҳамчунин ба ҳамкориҳои бомуваффақиятамон дар доираи муассисаҳои Бретон-Вудс ишора намоям.

Швейтсария ва Тоҷикистон ҳамчун кишварҳои кӯҳӣ, ки новобаста аз захираҳои бойи об ба роҳҳои баҳрӣ дастрасӣ надоранд, ба идоракунии босуботи захираи обҳои фаромарзӣ ва истифодаи он баҳри некӯаҳволии ҳамагон, ҳамчунин ба сатҳи ҳамкориҳои зичи худ дар ин ҷода баҳои баланд медиҳанд.

Изҳори умедворӣ менамоем, ки ҷаҳду талошҳои муштараки мо баҳри татбиқи ташаббуси «Сулҳи нилгун дар Осиёи Марказӣ» ба рушди муколамаи ҳама кишварҳои Осиёи Марказӣ дар масоили марбут ба об ва чолишҳои муҳити зист мусоидат хоҳанд кард.

Дар рӯҳияи дӯстӣ ба Шумо ва халки тоҷик тамоми хушиҳои зиндагиро таманно дорам.

Иҷозат фармоед, ҷаноби Олӣ, ғояти эҳтироми худро таҷдид намоям».

Декабрь 9, 2017 08:00

Хабарҳои дигари ин бахш

Пешвои миллат Эмомалӣ Раҳмон дар ноҳияи Восеъ аз боғи хоҷагии деҳқонии Миралӣ Маҳмадалӣ боздид намуданд
Президенти Ҷумҳурии Тоҷикистон Эмомалӣ Раҳмон дар ноҳияи Восеъ 12 километр роҳи мумфаршу чароғонро ба истифода доданд
Сарвари давлат Эмомалӣ Раҳмон дар ноҳияи Восеъ бинои Маҷмааи варзишии ба номи Лолахон Қаҳҳоровро мавриди истифода қарор доданд
Пешвои миллат Эмомалӣ Раҳмон дар ноҳияи Восеъ корхонаи дӯзандагӣ ва маркази хизматрасонии «Дурдона»-ро ифтитоҳ намуданд
Сарвари давлат Эмомалӣ Раҳмон дар ноҳияи Восеъ ба таври фосилавӣ ба фаъолияти як қатор иншооти таъйиноти гуногун оғоз бахшиданд
Пешвои миллат Эмомалӣ Раҳмон дар ноҳияи Восеъ Маркази касбомӯзӣ ва хизматрасониро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар ноҳияи Восеъ бинои нави Маркази ташхисии «Тибби Ҳулбук»-ро ифтитоҳ намуданд
Сарвари давлат Эмомалӣ Раҳмон Варзишгоҳи марказии ноҳияи Восеъро мавриди истифода қарор доданд
Сафари кории Пешвои миллат Эмомалӣ Раҳмон ба ноҳияи Восеъ бо ифтитоҳи Майдони Парчам ва Нишони давлатӣ оғоз ёфт
Президенти Ҷумҳурии Тоҷикистон Эмомалӣ Раҳмон роҳбарони ҳайатҳои прокуратураҳои генералии кишварҳои иштирокдори ИДМ-ро ба ҳузур пазируфтанд
Пешвои миллат Эмомалӣ Раҳмон дар шаҳри Душанбе шаҳраки нави саноатиро ифтитоҳ намуданд
Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати ҷашни Меҳргон