Мубодилаи барқияҳои табрикии Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Молдова Игор Додон

ДУШАНБЕ, 26.01.2018. /АМИТ «Ховар»/. Имрӯз миёни Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Молдова Игор Додон ба муносибати 25-умин солгарди барпо намудани робитаҳои дипломатии ду давлат мубодилаи барқияҳои табрикӣ ба амал омад.

Дар барқияи табрикии Президенти Ҷумҳурии Тоҷикистон муҳтарам Эмомалӣ Раҳмон ба унвони Президенти Ҷумҳурии Молдова Игор Додон омадааст:

«Муҳтарам Игор Николаевич,

Бо камоли самимият Шуморо ба муносибати санаи муҳим дар таърихи муосири муносиботи Тоҷикистон ва Молдова — 25-солагии истиқрори равобити дипломатӣ байни давлатҳоямон табрик мегӯем.

Боиси қаноатмандист, ки тайи ин давра муносибатҳои дӯстӣ ва ҳамкорӣ миёни Тоҷикистон ва Молдова дар асоси дуҷониба ва ҳам дар чорчӯби сохторҳои бисёрҷонибаи байналмилаливу минтақавӣ хислати рушди пайгирона доштанд.

Изҳори итминон менамоям, ки бо такя ба таҷрибаи андӯхтаи мусбат равобити байнидавлатии ду ҷумҳурӣ дар маҷрои манфиатҳои аслии мардумонамон минбаъд низ тавсеаву таҳким хоҳанд ёфт.

Муҳтарам ҷаноби Президент, ба Шумо сиҳатмандии комилу комёбиҳои нав дар фаъолияти давлатиатон ва ба мардуми дӯсти Молдова сулҳу созгорӣ ва рифоҳ таманно менамоям».

Дар барқияи табрикии Президенти Ҷумҳурии Молдова Игор Додон ба унвони Президенти Ҷумҳурии Тоҷикистон Эмомалӣ Раҳмон чунин гуфта шудааст:

«Муҳтарам ҷаноби Президент,

Шуморо сидқан бо 25-солагии истиқрори муносибатҳои дипломатӣ миёни Ҷумҳурии Молдова ва Ҷумҳурии Тоҷикистон табрику таҳният мегӯям.

Тайи солҳои сипаригашта давлатҳои мо ба хотири тавсеаву таъмиқи ҳамкории байнидавлатӣ, ки дар фазои ҳусни тафоҳум, эҳтиром ва муколамаи созанда рушд меёбанд, кори зиёдеро анҷом доданд.

Бо истифода аз фурсати фароҳамшуда мехостам изҳори итминони комил намоям, ки муносибатҳои анъанавии дӯстӣ ва шарикии баробарҳуқуқӣ миёни давлатҳоямон минбаъд низ дар самтҳои мухталиф бомуваффақият рушд хоҳанд кард.

Ба Шумо, муҳтарам ҷаноби Президент, дар фаъолияти масъулиятноки давлатиатон дастовардҳои намоёни навин ва ба мардуми дӯсти тоҷик сулҳу ризоият ва шукуфоӣ орзумандам».