«Тоҷик Эйр» шумораи парвозҳоро ба самти Деҳлӣ зиёд менамояд

ДУШАНБЕ, 12.01.2018. /АМИТ «Ховар»/. Аз 16 феврал ширкати миллии «Тоҷик Эйр» шумораи парвозҳоро ба самти Душанбе – Деҳлӣ– Душанбе зиёд мекунад. Мусофирон метавонанд дар як ҳафта ду маротиба – рӯзҳои сешанбе ва ҷумъа ба Ҳиндустон сафар намоянд. Парвозҳо тавассути ҳавопаймои «Boeing 737-300» сурат мегиранд.

Давомнокии парвоз дар як самт 2 соату 30 дақиқаро ташкил дода,  арзиши чипта 3 ҳазору 953 сомониро ташкил медиҳад. Тавре ба АМИТ «Ховар» котиби матбуоти ширкати «Тоҷик Эйр» Азиз Хайруллоев иттилоъ дод, васеъ гардидани хатсайри парвозҳои ширкати миллии «Тоҷик Эйр» барои рафту омади сокинони мамлакат ба хориҷи ҷумҳурӣ ва ворид шудани шумораи зиёди сайёҳони хориҷӣ ба мамлакат мусоидат мекунад.

Ҳамчунин ширкати ҳавопаймоии «Тоҷик Эйр»  хизматрасониҳои интиқоли мусофирон ва борро ба самтҳои   Алмаато, Бишкек,  Деҳлӣ, Теҳрон, Москва, Санкт-Петербург, Екатеринбург, Новосибирск, Сургут  ва Хуҷанду Хоруғ пешниҳод менамояд.

Барои харидани чиптаҳо ва гирифтани маълумоти иловагӣ метавонед ба телефонҳои мазкур занг занед: (+992 48) 701 50 42; (+992) 905 100 200.