Раҷаббой Аҳмадзода: «Вазъи корхонаҳои бозистода омӯхта шуда, бояд онҳо дубора ба кор дароварда шаванд»

Февраль 7, 2018 16:16

ХУҶАНД, 07.02.2018. /АМИТ  «Ховар»/.  Вазъи он коргоҳҳои калону миёнае, ки солҳои пешин  хусусӣ гардонида шуда, вале дар давоми чанд соли охир тамоман  фаъолият накардаанд, бояд аз ҷониби масъулини мақомоти иҷроиявии ҳокимияти давлатии шаҳру ноҳияҳо ва сохторҳои марбута пурра омӯхта шуда, масъалаи дубора ба кор андохтани онҳо ҳал карда шавад. Ин нукта зимни нишасти матбуотии иҷрокунандаи вазифаи раиси вилояти Суғд Раҷаббой Аҳмадзода, ки бо иштироки 80 нафар намояндагони воситаҳои ахбори омма баргузор гашт, зикр гардид.

Ба иттилои роҳбари вилоят,  соли гузашта аз 590 адад коргоҳҳои саноатии вилоят 72 ададашон фаъолият накарданд, ки шумораи бештари онҳо дар шаҳру ноҳияҳои Хуҷанд, Исфара, Б.Ғафуров, Мастчоҳ, Гулистон, Бӯстон, Зафаробод, Ҷ.Расулов воқеанд.  Дар ин замина, баҳри иҷрои дастуру супоришҳои Сарвари давлат муҳтарам Эмомалӣ Раҳмон масъулини мақомоти иҷроияи ҳокимияти давлатии вилоят, саноатчиён ва соҳибкорону соҳибмулкони ин коргоҳҳоро  зарур аст, ки давоми соли 2018 барои фаъол гардонидани коргоҳҳои аз кор бозмонда кӯшиш ба харҷ диҳанд. Ин имкон медиҳад, ки соҳибкорони вилоят баробари дубора ба кор андохтани ин коргоҳҳо дар самти афзоиши маҳсулоти саноатӣ ва ташкили коргоҳҳои нав муваффақ гарданд.

Раҷаббой Аҳмадзода ҳамчунин зикр намуд, ки новобаста аз фаъолият бозмондани ин шумора коргоҳҳо соли 2017 дар миқёси вилоят ҳаҷми истеҳсоли маҳсулоти саноатӣ нисбат ба соли 2016  131,5 фоизро ташкил дода, он ба 9,9 миллиард сомонӣ баробар гардид. Саҳми тавозуни вилоят дар маҷмӯи маҳсулоти минтақавии ҷумҳурӣ  50 дарсадро ташкил медиҳад.

Ҳамзамон соли 2017 дар қаламрави вилоят 84 корхонаи нав бунёд гардида, 1479 ҷойи нави корӣ фароҳам оварда шудааст. Дар ин замина, дар самти содироти маҳсулот  низ натиҷаҳо  назаррасанд. Аз ҷумла, истеҳсол ва содироти семент ва маъдан бештар буда, ҳаҷми фурӯши семент дар бозорҳои беруна ба 248,2 ҳазор тонна расонида шудааст, ки нисбат ба соли 2016 6,2 млн. доллар зиёд мебошад.  Инчунин воридоти орд ва содироти пахта низ ҳамчун ашёи хоми саноатӣ  коҳиш ёфтааст, ки ин нишондод аз вусъати раванди коркарди пурраи ин ашёи хом дар ҳудуди вилоят дарак медиҳад.

Дар анҷоми нишасти матбуотӣ  Раҷаббой Аҳмадзода дар вазъияти тантанавӣ  ба 38 нафар ғолибони озмуни вилоятии «Хомаи созанда-2017» ва ҳамчунин се нафар собиқадори соҳаи матбуот Файзулло Атохӯҷаев, Муҳаррам Юсуфова ва Мирзоҳамдам Шариф  диплом ва мукофотпулӣ супорид.

Февраль 7, 2018 16:16

Хабарҳои дигари ин бахш

Дар Суғд беш аз 75 ҳазор нафар кӯдакону наврасон ба истироҳат фаро гирифта мешаванд
Дар истироҳатгоҳи «Ширкент» зиёда аз 1300 нафар кӯдакону наврасон истироҳат менамоянд
Қарзи давлатии ҷаҳонӣ ба 102 триллион доллар расид
Дар ноҳияи Рӯдакӣ 933 ҳолати қоидавайронкунии истифодаи неруи барқ ошкор карда шуд
Дар Маркази солимгардонии Суғд беш аз 200 нафар кӯдакону наврасон ба истироҳат ҷалб гардидаанд
Сокинони Анқараро даъват карданд, ки обро сарфакорона истифода намоянд
Мегафон Тоҷикистон: «Вақте роҳати хона бештар аст»
Имрӯз дар шаҳри Душанбе ҳаво то 37 дараҷа гарм мешавад
САЙРИ БАДАХШОН. Дар вилоят 647 адад ёдгориҳои таърихӣ, табиӣ ва монументалӣ ҷойгир мебошанд
Имрӯз дар ноҳияҳои кӯҳии Тоҷикистон ҳаво то 35 дараҷа гарм мешавад
Дар ноҳияи Дарвоз истеҳсоли картошка 3 баробар, сабзавот 5 ва мева 9 баробар афзоиш ёфтааст
РАҚАМИКУНОНӢ. Маркази тамос барои хизматрасонӣ ба нафақагирон тавассути рақами кутоҳи 3900 фаъол гардид