Аз узвияти Тоҷикистон ба Созмони ҷаҳонии савдо 5 сол сипарӣ гардид

ДУШАНБЕ, 02.02.2018 /АМИТ «Ховар»/. Имрӯз, 2 март аз узвияти Ҷумҳурии Тоҷикистон ба   Созмони ҷаҳонии савдо /СҶҶ/  5 сол сипарӣ гардид. 2 марти соли 2013 баъд аз саъю талошҳои 11-солаи Ҳукумати Ҷумҳурии Тоҷикистон ҷумҳуриамон дар минтақаи Осиёи Марказӣ дуюмин шуда, узви комилҳуқуқи Созмони ҷаҳонии савдо шуд.

Бояд тазаккур дод, ки  ба узвияти СҶС пазируфта шудани Ҷумҳурии Тоҷикистон аз соли  2001 шурӯъ гардида буд.  Моҳи майи соли 2001 Ҳукумати Ҷумҳурии Тоҷикистон бо мақсади тақвияти ҳамгироии иқтисодиёти миллӣ ба иқтисодиёти ҷаҳонӣ,  таъмини  савдои байналмилалии озод, рақобати одилона, либерализатсияи сиёсати савдо ва рушди  муносибатҳои иқтисодии бисёрҷониба ба котиботи СҶС  барои шомил шудани Ҷумҳурии  Тоҷикистон ба ин Созмон дархост пешниҳод намуда буд.

Моҳи июли соли 2010  Шӯрои генералии СҶС дар асоси дархости Ҷумҳурии Тоҷикистон қарорро дар бораи таъсис додани гурӯҳи корӣ оид ба шомилшавии Ҷумҳурии Тоҷикистон ба ҳайати СҶС қарор қабул намуда, ба Ҷумҳурии Тоҷикистон  мақоми кишвари нозир дода шуд. Инчунин ҷиҳати мутобиқ намудани қонунгузории амалкунандаи Ҷумҳурии Тоҷикистон ба қоида ва меъёрҳои СҶС ва ташкили заминаи меъёрии ҳуқуқии вобаста ба СҶС ҳуҷҷатҳои зарурӣ тартиб дода шуда, гуфтушунидҳои дуҷониба ва бисрёҷониба бо кишварҳои узви СҶС гузаронида шуд. Дар ин росто, беш аз 80 санади меъёрии ҳуқуқии вобаста ба СҶС қабул гардиданд.

Бояд тазаккур дод, ки  гардиши савдои озод байни давлатҳои аъзои СҶС аз ҳадафҳои асосии ин созмони муътабари байналмилалӣ  мебошад.

Созмони ҷаҳонии савдо моҳи январи соли 1995 таъсис дода шуда, беш аз 160 давлати ҷаҳон узви баробарҳуқуқи он мебошанд.  Қароргоҳи СҶС шаҳри Женеваи Швейтсария буда, ин созмони ҷаҳонӣ беш аз 600 нафар корманд дорад.