Дар Соли рушди сайёҳӣ ва ҳунарҳои мардумӣ ба сокинону сайёҳони шаҳри Норак дар сатҳи баланд хизмат расонида мешавад

НОРАК, 02.03.2018 /АМИТ «Ховар»/. Муассисаи давлатии шуъбаи манзилию коммуналӣ ва хоҷагидории назди мақомоти иҷроияи ҳокимияти давлатии шаҳри Норак аз ҳисоби  лоиҳаи «Идоракунии  партовҳои сахти маишии шаҳри Норак», ки байни Ҷумҳурии Тоҷикистон  ва Бонки Аврупоии Таҷдид ва Рушд ба имзо расида буд, соҳиби 16 адад мошини махсуси партовҷамъкунӣ, аз қабили мошинҳои махсуси партовкашонӣ, экскаватор, булдозер, мошини обкашӣ, мошини обпошак, мошини қумпошак, трактори алафдаравӣ, автобус, механизмҳои боркунанда ва 497 адад куттиҳои гуногунҳаҷм гардид. Дар  ин бора аз муассисаи мазкур ба хабарнигори АМИТ «Ховар» иттилоъ доданд.

Тибқи иттилои сардори Муассисаи давлатии шуъбаи манзилию коммуналӣ ва хоҷагидории шаҳри Норак Субҳон Ҷураев, соли 2014  байни Ҳукумати Ҷумҳурии Тоҷикистон ва Бонки Аврупоии Таҷдид ва Рушд созишномаҳои  кафолатӣ, қарзӣ, грантӣ ва дастгирии лоиҳа ба имзо расонида шуданд, ки арзиши умумиашон 5 миллиону 40 ҳазор доллари амрикоиро ташкил дода, айни замон амалӣ гардида истодаанд.

Мақсади асосии лоиҳаи «Идоракунии  партовҳои сахти маишии шаҳри Норак» аз ҷорӣ намудани технологияҳои муосири идораи партовҳои сахти маишӣ ҷорӣ намудани усулҳои нави ҷамъоварӣ ва баровардани партовҳо, баланд бардоштани сифати хизматрасонӣ ва беҳтар гардонидани  вазъи санитарию экологии  шаҳр, навсозии партовгоҳи маркази шаҳр бо истифода  аз меъёрҳои  аврупоӣ, ки ба талаботи санитарию экологӣ ҷавобгӯ бошад, иборат аст.

Субҳон Ҷураев зикр намуд, ки «шаҳри Норак маркази боздиди  сайёҳони дохилию хориҷӣ ба ҳисоб меравад ва татбиқи лоиҳаи «Идоракунии  партовҳои сахти маишии шаҳри Норак» ба мо имкон медиҳад, ки дар Соли рушди сайёҳӣ ва ҳунарҳои мардумӣ ба сокинону сайёҳони шаҳри Норак бо технологияи замонавӣ дар сатҳи баланд хизмат расонем».