«ПЕШВОИ МИЛЛАТ – ТАШАББУСКОРИ ҲАЛЛИ МАСЪАЛАҲОИ МУШКИЛОТИ ОБ ДАР САЙЁРА». Дар Душанбе ҳамоиши ҷавонон доир гардид

ДУШАНБЕ, 19.04.2018 /АМИТ «Ховар»/. Дар шаҳри Душанбе дар доираи тантанаҳои таҷлили “Рӯзи пойтахт” ҳамоиши ҷавонон таҳти унвони «Пешвои миллат – ташаббускори ҳалли масъалаҳои мушкилоти об дар сайёра» доир гардид. Ҳамоиши мазкур дар доираи ҳамкории муштараки Мақомоти иҷроияи ҳокимияти давлатии шаҳри Душанбе, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Академияи илмҳои Ҷумҳурии Тоҷикистон ва бо ташаббуси Раёсати кор бо ҷавонон ва варзиши шаҳри Душанбе баргузор карда шуд.

Тавре ба АМИТ «Ховар» аз Раёсати кор бо ҷавонон ва варзиши шаҳри Душанбе Махкамбой Гулов хабар дод, мақсади баргузории ҳамоиш дастгирии ҷавонон аз ташаббуси навбатии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мавриди ҷонибдории ҷомеаи ҷаҳонӣ аз пешниҳоди Тоҷикистон — Даҳсолаи байналмилалии амал «Об барои рушду устувор» барои солҳои 2018 — 2028 мебошад.

Дар қисмати расмии чорабинӣ Президенти Академияи илмҳои Ҷумҳурии Тоҷикистон Фарҳод Раҳимӣ, Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳтам Абдуллозода, муовини Раиси шаҳри Душанбе Мавсума Муинӣ ва Директори Маркази тадқиқоти стратегии назди Президенти Ҷумҳурии Тоҷикистон Худобердӣ Холиқназар суханронӣ намуда, нақши Пешвои миллат, муҳтарам Эмомалӣ Раҳмонро дар ҳалли масъалаҳои марбут ба об дар сайёра назаррас, ҳалкунанда ва манфиатбахш маънидод карданд.

Дар идомаи ҳамоиш узви вобастаи АИ ҶТ, профессор Зайналобудин Кобулиев дар мавзӯи «Истифодаи оқилонаи захираҳои обию энергетикии Осиёи Марказӣ» ва муҳаққиқону коршиносон, олимони ҷавон дар мавзӯъҳои «Экология ва рушди устувор», «Масъалаҳои асосии идоракунии об дар Осиёи Марказӣ”, «Истифодаи СИГ (ГИС)-технология ҷиҳати арзёбии офатҳои табиии вобаста ба об», «Ташаббусҳои ҷаҳонии Пешвои миллат дар масъалаҳои марбут ба об», «Тоҷикистон — ташаббускори масоили обӣ дар сатҳи ҷаҳонӣ» ва «Ҳолати захираҳои гидроэнергетикии Тоҷикистон» маърӯзаҳо намуданд.

Бино ба иттилои Махкамбой Гулов, рӯзҳои наздик аз ҷониби Раёсати кор бо ҷавонон ва варзиши шаҳри Душанбе баргузории аксияи тарғиботи таҳти унвони «Сарфаҷӯии об – мароми мост!» ва озмуни расми беҳтарин дар робита ба дастгирии ташаббуси навбатии Тоҷикистон аз ҷониби ҷомеаи ҷаҳонӣ ва эълон гардидани Даҳсолаи байналмилалии амал «Об барои рушду устувор» барои солҳои 2018 — 2028 дар назар дошта шудааст.