Дар Суди конститутсионӣ Рӯзи Парчами давлатӣ таҷлил гардид

ДУШАНБЕ, 25.11.2025 /АМИТ «Ховар»/. Дар Суди конститутсионӣ бо иштироки роҳбарият ва ҳайати кормандон бахшида ба Рӯзи Парчами давлатии Ҷумҳурии Тоҷикистон ҳамоиши тантанавӣ доир гардид. Дар ин хусус ба АМИТ «Ховар» аз Суди конститутсионӣ хабар доданд.

Дар ҳамоиш иброз гардид, ки Парчами миллӣ имрӯз чун рамзи давлатдории тоҷикон дар бинои тамоми идораҳои давлативу маъмурӣ, ташкилоту муассисаҳо, корхонаҳо, муассисаҳои таълимӣ, иншооти варзишӣ, ҳуҷраҳои корӣ ва хонаҳои истиқоматии шаҳрвандон насб гардида, мардуми моро дар ҷодаи сарсабзиву ободӣ ва зиндагии босаодат руҳу илҳом мебахшад.

Парчами давлатӣ ҳамчун рамзи давлатдории миллӣ дар замони соҳибистиқлолӣ тавонист, ки ваҳдату ягонагӣ, ҳисси баланди миллӣ, нангу номуси ватандӯстӣ, инсондӯстию фарҳангсолорӣ ва саъю талоши созандагии мардуми сарбаланди тоҷикро ифода намуда, онро устувор намояд.

Парчами давлатии Ҷумҳурии Тоҷикистон баёнгари мустақилият, ягонагиву сарҷамъӣ, шарафмандӣ, ватандӯстию ватанпарастӣ, таҷассуми ғурури миллӣ, инчунин ифодакунандаи мақсаду маром ва орзуву ормонҳои мардуми бонангу номус ва меҳнатқарину бофарҳанги тоҷик маҳсуб шуда, ифодакунандаи ояндаи дурахшони ватани азизамон мебошад.

АКС: Суди конститутсионии Ҷумҳурии Тоҷикистон