Ҷавонони фаъоли кишвар таҳти шиори «Пайравони Пешвои миллатем!» ба ноҳияи Ашти вилояти Суғд сафарбар шуданд

ДУШАНБЕ, 18.05.2018 /АМИТ «Ховар»/.  Бахшида ба Рӯзи ҷавонони Тоҷикистон бо ташаббуси Кумитаи  кор бо ҷавонон ва варзиши назди Ҳукумати Ҷумҳурии Тоҷикистон таҳти сарпарастии Президенти Федератсияи футболи Тоҷикистон Рустами Эмомалӣ дар доираи Соли рушди сайёҳӣ ва ҳунарҳои мардумӣ имрӯз, як гурӯҳ ҷавонони фаъоли кишвар, гирандагони стипендияи Президентӣ, волонтёрони фаъоли Кумита таҳти унвони «Пайравони Пешвои миллатем!» ба  ноҳияи Ашти вилояти Суғд сафар намуданд.

Тавре ба мухбири АМИТ «Ховар» аз Кумитаи мазкур хабар доданд, сафари мазкур дар доираи нақшаи «Меҳмониҳои ҷавонони Тоҷикистон» роҳандозӣ гардида истодааст. Мақсад аз сафар ин  омӯзиши расму оин, дӯстиву рафоқати ҷавонон, густариши ваҳдат ва истиқлолияти комили кишвар, боздид аз мавзеъҳои таърихию омӯзишии  ноҳия мебошад.

Меҳмонии мазкур бо усули «хона ба хона» роҳандозӣ гардида, ҷавонон дар хонаҳои мардуми ноҳияи Ашт муддати ду рӯз истиқомат мекунанд ва барои хеш оилаи наве пайдо менамоянд. Ин усул метавонад дар роҳи густариш ва нигоҳдошти ваҳдати комили миллӣ замина мусоид фароҳам оварад.

Бояд зикр намуд, ки муддати чанд сол аст меҳмониҳои мазкур аз ҷониби Кумитаи кор бо ҷавонон ва варзиш дар якҷоиягӣ бо мақомоти иҷроияи ҳокимияти давлатии шаҳру навоҳии кишвар роҳандозӣ мегардад.