Дар шаҳри Вахдат озмуни «Бозори ҳунар» доир гардид

ВАҲДАТ, 02.05.2018 /АМИТ  «Ховар»/. Дар шаҳри Ваҳдат бо мақсади эҳё ва дастгирии ҳунарҳои мардумӣ, арҷгузорӣ ба ҳунарҳои миллӣ ва тарғибу ташвиқи онҳо, васеъ ба роҳ мондани фаъолияти устохонаҳои ҳунармандӣ, ҳунаромӯзӣ ва ҷалби ҳарчи бештари наврасону ҷавонон ба ҳунаромӯзию ҳунармандӣ ва муаррифии дастовардҳои ҳунармандон дар сатҳи ҷумҳурӣ, бо ҷалби тамоми ҳунармандони ҷамоатҳои шаҳраку деҳот ва ташкилоту муассисаҳо озмуни умумишаҳрии «Бозори ҳунар» баргузор гардид. Дар ин бора аз шуъбаи фарҳанги шаҳри Ваҳдат ба хабарнигори минтақавии АМИТ «Ховар» хабар доданд.

Тавре мудири шуъбаи фарҳанги шаҳри Ваҳдат Эркамоҳ Мирзоева иброз намуд, тарбияи ҳисси хештаншиносӣ, зебоипарастӣ, эҳтиром ба арзишҳои миллӣ, ба наврасону ҷавонон шиносонидани ҳунарҳои аҷдодӣ, зинда гардонидани ҳунарҳои қадима ва ба ин васила эҳё ва рушди ҳунарҳои мардумӣ, бунёди марказҳои алоҳидаи ҳунармандӣ ва ҷалбу муаррифии ҳунарҳои миллӣ ба меҳмонону сайёҳон, дарёфти чеҳраҳои нави ҳунарҳои миллӣ дар ҳудуди шаҳри Ваҳдат аз вазифаҳои асосии озмун буданд.

Тибқи иттилои манбаъ, беҳтарин  ҳунармандони шаҳр дар озмуни мазкур аз руйи шартҳои «Асбоби беҳтарин», «Ҳунари зебо ва бомаҳорат», «Устои ҷавонтарин», «Кадбонуи беҳтарин» ва «Беҳтарин ҷамоату шаҳрак, корхонаву муассиса» сазовори ифтихорнома ва туҳфаҳои хотиравӣ гардиданд.