Донишгоҳи давлатии Хуҷанд ва Донишгоҳи давлатии Андиҷон байни ҳам созишномаи ҳамкорӣ ба имзо расониданд

ХУҶАНД. 07.05.2018. /АМИТ «Ховар»/. Бо мақсади заминагузори ба табодули таҷриба ва баланд бардоштани сифати таълим ва ҳамзамон қавӣ гардидани робитаи дӯстӣ ва пайдо намудани шиносоии бештар аз фарҳангу тамаддуни байниҳамдигар, дирӯз намояндагони Донишгоҳи давлатии Андиҷони Ҷумҳурии Ӯзбекистон ба номи Заҳриддин Муҳаммад Бобур ба Донишгоҳи давлатии Хуҷанд ба номи академик Бобоҷон Ғафуров ташриф оварданд.

Тавре мухбири минтақавии АМИТ “Ховар” хабар медиҳад, зимни мулоқоти судманд роҳбарияти ду донишгоҳ аз сиёсати хирадмандонаи сарварони ду давлат вобаста ба робита ва ҳамкорӣ миёни ду халқи ба ҳам дӯст ва бародар ёдовар гардида, зикр намуданд, ки имрӯз байни Тоҷикистону Ӯзбекистон анқариб дар ҳамаи соҳаҳо ҳамкорӣ рӯз аз рӯз қавитару мустаҳкам гардида истодааст.

Дар аснои мулоқот ректори ДДХ профессор Ҷамшед Ҷӯразода зикр кард, ки Донишгоҳи давлатии Хуҷанд ба номи академик Бобоҷон Ғафуров имрӯз бо ду донишгоҳи Ҷумҳурии Ӯзбекистон — Донишгоҳи давлатии Самарқанд ва Донишгоҳи давлатии Фарғона шартномаи ҳамкорӣ дошта, ҷиҳати мустаҳкам намудани робитаҳои дӯстӣ ва табодули таҷриба бо дигар донишгоҳҳои ин кишвар низ омодааст.

Бахтиёр Расулов, муовини  ректор оид ба корҳои илми Донишгоҳи давлатии Андиҷон ба номи Заҳриддин Муҳаммад Бобур дар навбати худ аз пешвоз ва меҳмоннавозии мардуми тоҷик изҳори сипос намуда, баён дошт, ки ҳамкории ду донишгоҳ метавонад ба рушд ва табодули таҷрибаи олимону донишҷӯён заминаи қавӣ гузорад.

Миёни ду донишгоҳ  созишнома оид ба  ҳамкорӣ ба имзо расид, ки мувофиқи он, минбаъд донишҷӯён ва магистрантони ҳарду донишгоҳ метавонанд дар донишгоҳҳои якдигар таҳсил ва таҷрибаомӯзӣ намоянд.

Дар интиҳои мулоқот роҳбарияти Донишгоҳи давлатии Хуҷанд ҳамчун рамзи дӯстӣ ба намояндагони Донишгоҳи давлатии Андиҷон маҷмӯаи асарҳои асосгузори адабиёти муосири тоҷик Садриддин Айниро тақдим намуд.