Имрӯз тамоми осорхонаҳои ҷумҳурӣ дарҳои худро барои меҳмонону тамошобинон ба таври ройгон боз мекунанд

ДУШАНБЕ, 18.05.2018 /АМИТ «Ховар»/.  Тавре қаблан иттилоъ додем, бахшида ба Рӯзи ҷавонони Тоҷикистон, ки ҳамасола 23 май таҷлил карда мешавад,  Кумитаи кор бо ҷавонон ва варзиши назди Ҳукумати ҷумҳурӣ тасмим гирифтааст, ки як зумра чорабиниҳоро баргузор намояд.

Тавре аз Кумитаи кор бо ҷавонон ва варзиши назди Ҳукумати ҷумҳурӣ хабар доданд, Кумита шурӯъ аз 10 то 23 майи соли равон дар тамоми шаҳру ноҳияҳои ҷумҳурӣ чорабиниҳои фарҳангию фароғатӣ, илмию  маърифатӣ, оммавию  варзишӣ ва солимгардонӣ  бахшида ба ин рӯз  таҳти унвони «Ҷавонон – пайрави Пешвои миллат»  дар сатҳи баланди ташкилӣ баргузор карда истодааст. Дар доираи ин тадбир имрӯз, 18 майи соли равон дар тамоми шаҳру навоҳии мамлакат ҳамоиши умумиҷумҳуриявии тамошои ройгони осорхонаҳо баргузор мегардад.

Дар ин рӯз тамоми осорхонаҳои ҷумҳурӣ дарҳои худро барои меҳмонону тамошобинон ба таври ройгон боз мекунанд. Ин ҳамоиш метавонад дар ҳифзу нигоҳдошти мероси қадимаи ниёгони миллати тоҷик, пос доштани арзишҳои маънавию таърихӣ ва тарбият намудани ҷавонон дар роҳи худшиносиии миллӣ заминаи мусоид фароҳам оварад.