42 нафар волидони наваскарон аз Бохтару Варзоб, Рӯдакиву Темурмалик, Турсунзодаву Ҳисор бо шароити хизмати фарзандонашон шинос шуданд

ХУҶАНД, 02.06.2018. /АМИТ «Ховар»/.  Бо мақсади шиносоӣ аз шароити буду боши фарзандон дар сафи Қувваҳои Мусаллаҳи ҷумҳурӣ гурӯҳи калони волидайни сарбозон аз шаҳру ноҳияҳои Бохтар, Варзоб, Рӯдакӣ, Темурмалик, Турсунзода, Ҳисор ва ҳамчунин Деваштичу Истаравшан аз қисми сарҳадии воқеъ дар Ҷамоати деҳоти Навбаҳори ноҳияи Мастчоҳ боздид намуданд.

Тавре ба АМИТ «Ховар» мудири шуъбаи рушди иҷтимоӣ ва робита бо ҷомеаи ноҳияи Мастчоҳ Мирзошариф Шарипов иттилоъ дод, зимни боздид аз қисми низомӣ, волидайни сарбозон тавассути суҳбату мулоқот бо ҳайати роҳбарикунандаи қисми ҳарбӣ ва сарбозон бевосита бо шароити хизмату истироҳати фарзандонашон дар сафи Қувваҳои Мусаллаҳ шинос шуданд.

Ҳамзамон дар ин рӯз чорабинии идона – савгандёдкунӣ доир гардида, 80 нафар наваскарон савганди ҳарбӣ ёд намуда, омодагии хешро барои адои хизмати Ватан баён доштанд.

Ба иттилои масъулин, роҳандозии ҳамин гуна тадбирҳо имкон медиҳад, ки сол аз сол теъдоди ихтиёриёни хизмат дар сафи артиш афзояд. Ҳамзамон волидон низ зимни дидорбинӣ фарзандони худро ба ватандӯстиву хештаншиносӣ даъват намуда, ба онҳо хизмати содиқонаю софдилона талқин месозанд.

Бояд тазаккур дод, ки сафарбарнамоии волидон аз як манотиқи кишвар ба минтақаҳои дигари мамлакат ва шиносоии онҳо бо шароити хизмати фарзандонашон ба ҳукми анъана даромада, он имкон медиҳад, ки волидон аз наздик бо фарзандони худ дидорбинӣ намоянд.