Дар Туркия Анҷумани тоҷикон таъсис ёфт

ДУШАНБЕ, 18.06.2018 /АМИТ «Ховар»/. Дар арафаи Рӯзи Ваҳдати миллӣ дар шаҳри  Истанбули Туркия Анҷумани тоҷикон таъсис дода шуд, ки  то ҷое рамзӣ низ мебошад.

Ҳадафи таъсиси Анҷумани тоҷикон дар Туркия муттаҳид ва ба ҳам овардани ҳамватанони муқими кишвари дӯсту бародари Тоҷикистон — Туркия мебошад.

-Анҷуман дар самти фароҳам овардани шароити зарурии фарҳангӣ, дастгирии маънавӣ ва ҳуқуқии табақаҳои гуногуни шаҳрвандони кишвар, ҷанбаҳои дигари будубоши ҳамватанон дар кишвари иқомат ва ташкили чорабиниҳои фарҳангӣ фаъолият хоҳад кард,-мегӯяд муовини роҳбари Анҷумани тоҷикон дар Туркия оид ба ҳамкорӣ бо ВАО ва равобити хориҷӣ Хуршед Назархудоев.  

Анҷуман дар баробари ин ба ҳамватанон барои ворид гардидан ба ҷомеаи кишвари иқомат, риояи қонунгузорӣ ва дигар масъалаҳои вобаста ба иқомат дар Ҷумҳурии Туркия дар доираи қонунҳои амалкунандаи кишвар корҳои роҳнамоӣ анҷом медиҳад.

Ҳадафҳои Анҷуман дар оянда  бо дарназардошти таҷрибаи иқомати ҳамватанон, мушкилоти мавҷуда ва пешниҳодҳои дахлдор такмил хоҳад гардид.

Саҳифаи расмии анҷуман дар сомонаи иҷтимоии Фейсбук чунин аст: https://www.facebook.com/tojikoniturkiya/