Мусоҳибаи Пешвои миллат Эмомалӣ Раҳмон бо хабарнигорони Шабакаи телевизионии ССТV — и Ҷумҳурии Мардумии Чин

ДУШАНБЕ, 08.06.2018 /АМИТ «Ховар» /АМИТ «Ховар»/.  Ҷумҳурии Тоҷикистон яке аз давлатҳои фаъоли узви Созмони Ҳамкории Шанхай ва Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон яке аз роҳбарони ташаббускори ҳалли мушкилоти байналмилалию минтақавӣ, инчунин саҳмгузори рушди муносибатҳои ҳамкории кишварҳои аъзо мебошанд.

Бо дарназардошти мавқеи муҳиму устувори кишвари мо дар ин ташкилоти бонуфузи сайёра хабарнигорони Шабакаи калонтарини телевизионии ССТV — и Ҷумҳурии Мардумии Чин қабл аз баргузории Ҷаласаи навбатии Шӯрои сарони давлатҳои аъзои Созмони Ҳамкории Шанхай дар Ҷумҳурии Мардумии Чин, бо Сарвари давлат муҳтарам Эмомалӣ Раҳмон дар шаҳри Душанбе мусоҳиба анҷом доданд.

Зимни суҳбат Президенти мамлакат муҳтарам Эмомалӣ Раҳмон оид ба нақши Созмони Ҳамкории Шанхай дар таъмини рушди устувору бемайлони иҷтимоию иқтисодии кишварҳои аъзо, дар бораи аҳамияти баргузории Ҷаласаи навбатии Шӯрои сарони давлатҳои аъзои Созмони Ҳамкории Шанхай дар вазъияти имрӯзаи ҷаҳон, таҳия ва татбиқи амалии муштараки санадҳои қабулшуда, вазъи феълии муносибатҳои дӯстию ҳамкории кишварҳои шарики стратегӣ — Тоҷикистону Чин, саҳми Тоҷикистону давлати ҳамсоя дар таҳкими ҳамкории минтақавӣ ба манфиати мардумони ду кишвар, инчунин дигар самтҳои равобити дуҷониба ба саволҳои хабарнигорони телевизиони Чин посухҳои мушаххасу пурмуҳтаво доданд.

Ҳалли масъалаҳои мубрами ҳамкории гуногунпаҳлуи кишварҳо, татбиқи минбаъдаи қарорҳои қабулшавандаи ҳамоиши навбатӣ оид ба таъмини суботу амнияти минтақавӣ ва тақвияти ҳамкории судманд дар арсаҳои сиёсӣ, иқтисодӣ ва гуманитарӣ дар чаҳорчӯбаи Созмони Ҳамкории Шанхай аз мавзӯъҳои дигари суҳбати Сарвари давлат бо хабарнигорон буд.

Мавриди зикр аст, ки мусоҳибаи Президенти Ҷумҳурии Тоҷикистон муҳтарам Эмомалӣ Раҳмон бо хабарнигорони чинӣ дар Шабакаи телевизиони ССТV-и Ҷумҳурии Мардумии Чин, дар сомонаҳои интернетӣ, дигар воситаҳои ахбори омма, аз ҷумла, дар рӯзномаи калонтарини Чин “Жэнмин Жибао” ба таври васеъ инъикос гардид ва то имрӯз аллакай миллионҳо нафар аз мазмуну муҳтавои ин суҳбат огаҳӣ пайдо карданд.