3 километр роҳи мошингарди маркази ноҳияи Роштқалъа васеъ ва асфалтпӯш мегардад

ХОРУҒ, 12.07.2018. /АМИТ «Ховар»/.  Роҳи мошингарди байни шаҳри Хоруғ ва ноҳияи Роштқалъа, ки бори охир 36 сол пеш таъмир гардида буд, имрӯз бар асари тармафароию сангчарх пурра хароб шудааст. Агарчи масофаи роҳ байни маркази вилоят ва ноҳия ҳамагӣ 35 километр аст, аммо ба сабаби вайрон будани роҳ мошинҳои мусофирбару боркаш ин масофаро дар ду-се соат тай мекунанд.

Директори Муассисаи давлатии нигаҳдории роҳҳои ин ноҳия Ғуломносир Пираков гуфт, ки «тавони вазнбардории роҳҳои мошингарди замони шӯравӣ ҳамагӣ аз 5 то 20 тонна буд. Илова бар ин шумораи воситаҳои нақлиёти хусусию давлатӣ даҳҳо баробар камтар буд. Ҳоло аз ин масири роҳ ҳамарӯза садҳо мошинҳои боркаши пуриқтидор ва сабукрав мегузаранд. Аз ин рӯ, бо супориши Ҳукумати ҷумҳурӣ батадриҷ роҳҳои мошингарди ноҳия аз нав сохта мешаванд. Ду моҳ пеш навсозии роҳи мошингарди маркази ноҳия, ки се километрро дар мегирад, шурӯъ шуд ва он аввали моҳи сентябри соли равон ба охир мерасад».

Роҳсозони ҶДММ «Панҷ»  то ин муддат 500 метр масофаи роҳро таъмир ва асфалтпӯш намудаанд.  Барои ба анҷом расондани корҳои сохтмонӣ  Дирексияи сохтмони иншооти ҳукуматии назди Дастгоҳи иҷроияи Президенти ҷумҳурӣ 3 миллион сомонӣ ҷудо намудааст.

Мутахассисони  Муассисаи давлатии нигоҳдории роҳҳои мошингарди ноҳия, ки масъулияти назорати корҳои навсозиро ба дӯш доранд, ба сифати кори роҳсозон баҳои баланд дода, изҳор намуданд, ки минбаъд бо роҳсозони ин ҷамъият ҳамкориро идома медиҳанд.