«ГУЛИ САФЕДИ ТОБИСТОН». Дар Душанбе асарҳои рассоми ҷавон Маърифат Давлатова ба намоиш гузошта шуданд

ДУШАНБЕ, 22.08.2018. /АМИТ «Ховар»/. Дар доираи таҷлили Соли рушди сайёҳӣ ва ҳунарҳои  мардумӣ дар  шаҳри Душанбе намоиши асарҳои рассоми ҷавону умедбахш Маърифат Давлатова баргузор гардид.    

Дар намоишгоҳ маҳсули  ҳунари бонуи чирадаст  ба маъарази тамошо гузошта шуд. Бояд зикр кард, ки дар  офаридаҳои рассоми ҷавон ҳусну малоҳат ва латофату назокати зан таҷассум ёфтаанд, ки аз тахаюлоти бою рангин ва зебоипарастии рассоми ҷавон шаҳодат  медиҳад.

Беш аз бист расмҳои офаридаи Маърифат  Давлатова таҳти унвони  «Интизорӣ»,  «Нигоҳ», «Гули сафеди тобистон», «Зан аз водии Бартанг», «Зани тоҷик», «Ҳаёт», «Зани ветнамӣ» ва «Қадами охирин»  ба намоиш гузошта шуда буданд, ки аз ҷониби иштирокдорон хуш пазируфта шуд.

Маърифат  Давлатова хатмкардаи  Донишгоҳи  технологии Тоҷикистон  буда, маҳсули дастони ӯ борҳо дар чорабиниҳои гуногуни фарҳангӣ ба маърази тамошо гузошта шудаанд.