Ифтитоҳи бинои маъмурии Вазорати корҳои дохилӣ дар шаҳри Душанбе

Ноябрь 9, 2018 10:43

ДУШАНБЕ, 09.11.2018 /АМИТ «Ховар»/. Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси шаҳри Душанбе муҳтарам Рустами Эмомалӣ дар пойтахти кишвар бинои нави маъмурии Вазорати корҳои дохилии Ҷумҳурии Тоҷикистонро дар вазъияти тантанавӣ мавриди баҳрабардорӣ қарор доданд.

Бинои мазкур аз 9 ошёна ва таҳхона иборат буда, бо муосиртарин шароити корӣ ва дастгоҳу таҷҳизоти зарурӣ муҷаҳҳаз гардонида шудааст. Корҳои сохтмонӣ дар ин иншоот соли 2016 оғоз ёфта, дар зарфи ду сол он бо назардошти талаботи муосири меъморӣ ва стандартҳои ҷории сохтмонӣ бунёд гардид.

Бинои нави маъмурӣ дорои 118 утоқи корӣ буда, бо дастгоҳу таҷҳизоти ҳозиразамон таъмин гардидааст. Ҳамчунин барои баланд бардоштани малакаи ҳайати шахсӣ дар таҳхонаи он 4 синфхонаи машғулиятҳои хизматӣ омода гардида, бо компютер, тахтаҳои электронӣ ва дигар дастгоҳҳои муосири соҳавӣ таъмин мебошад. Ба иттилои масъулин, дар ин бино минбаъд 4 раёсати Вазорати корҳои дохилии Ҷумҳурии Тоҷикистон фаъолият менамоянд. Ҳамчунин барои гузаронидани ҷаласаву ҷамъомадҳо иншооти мазкур бо толори маҷлисӣ, ки дорои 100 ҷои нашаст аст, таъмин буда, дар ошёнаи 9-ум толори хурди конфронсӣ бо тамоми шароити муосири корӣ ба истифода дода шуд.

Бинои маъмурӣ ҳамчунин дорои меҳмонхона буда, барои меҳмонон 4 утоқ бо шароити зарурии зиндагӣ омодаву мавриди истифода қарор гирифтааст.

Намои берунаи иншоот мутобиқ ба талаботи муосири шаҳрсозӣ буда, бо санъати баланди меъморӣ ба истифода дода шуд. Атрофи бино бо гулҳои ороишӣ, дарахтони сояафкан оро ёфта, роҳравҳои гирду атрофи иншоот ба пуррагӣ бо тахтасангҳо оро дода шудааст. Бино бо системаи муосири назоратӣ таъмин буда, ҳудуди иншооти мазкур пурра бо камераҳои мушоҳидавӣ таъмин мебошад.

Бояд тазаккур дод, ки давоми чанд соли охир дар саросари кишвар ҷиҳати беҳтар намудани шароити корӣ, зисту зиндагонӣ ва баланд бардоштани малакаи касбии хизматчиёни сохторҳои қудратӣ корҳои назаррас ба сомон расонида шудаанд. Аз ҷумла, ифтитоҳи ин бино намунаест аз таваҷҷуҳ ва ғамхории Ҳукумати Ҷумҳурии Тоҷикистон, бахусус Пешвои миллат нисбат ба фаъолияти кормандони сохтори мазкур.

Сарвари давлат бо шароит ва утоқҳои кории бинои маъмурӣ шинос шуда, кормандонро ба хизмати софдилонаву содиқона ба нафъи халқу Ватан даъват намуданд.

Дар ҳамин ҷо Пешвои миллат дар вазъияти тантанавӣ ба як қатор кормандони вазорат рутбаҳои махсуси навбатӣ супориданд.

Аз ҷумла, бо Фармони Президенти Ҷумҳурии Тоҷикистон муҳтарам Эмомалӣ Раҳмон ба Солиев Карим Ҳоҷиевич рутбаи навбатии «генерал — майори милитсия» супорида шуд.

Ҳамчунин дар мувофиқа бо Роҳбари давлат Султонзода Садриддинхон Исмоил бо рутбаи навбатии «полковники хизмати дохилӣ», Назарзода Икромҷон Ҳурматулло, Мӯсозода Муҳаммадалӣ Абдусаттор, Амирализода Сулаймон ва Сулаймонзода Ғуломалӣ Нуралӣ бо рутбаи навбатии «полковники милитсия» сарфароз гардонида шуданд.

Ҳамчунин дар ин рӯз аз ҷониби Раиси шаҳри Душанбе муҳтарам Рустами Эмомалӣ ба шуъбаи Бозрасии давлатии автомобилӣ дар шаҳри Душанбе нақлиёти замонавии хизматӣ тақдим карда шуд. Масъулони Вазорати корҳои дохилӣ дар навбати худ барои дастгирӣ ва таваҷҷуҳ нисбат ба фаъолияти мақомот ба роҳбарияти пойтахт миннатдории худро иброз намуданд.

Ифтитоҳи бинои маъмурии Вазорати корҳои дохилӣ дар шаҳри Душанбе 09.11.2018

Ноябрь 9, 2018 10:43

Хабарҳои дигари ин бахш

Пешвои миллат Эмомалӣ Раҳмон пас аз анҷоми сафари корӣ дар Вилояти Мухтори Кӯҳистони Бадахшон ба шаҳри Душанбе баргаштанд
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони Вилояти Мухтори Кӯҳистони Бадахшон мулоқот намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони Вилояти Мухтори Кӯҳистони Бадахшон
Президенти Ҷумҳурии Тоҷикистон Эмомалӣ Раҳмон дар шаҳри Хоруғ дар тантанаҳои идона ба ифтихори 28-солагии Рӯзи ваҳдати миллӣ иштирок намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон ба ифтихори 28-солагии Рӯзи ваҳдати миллӣ
Сарвари давлат Эмомалӣ Раҳмон дар шаҳри Хоруғ бинои нави истиқоматии 5-ошёна барои хизматчиёни давлатиро мавриди истифода қарор доданд
Эмомалӣ Раҳмон: «Қаҳрамонони сулҳу субот ва ваҳдати миллӣ танҳо мардуми шарифу сарбаланди Тоҷикистон мебошанд»
Пешвои миллат Эмомалӣ Раҳмон дар ҳудуди Парки технологии шаҳри Хоруғ коргоҳҳои истеҳсолии маҳсулоти гӯштӣ ва обҳои табиии ташнашиканро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ бо лоиҳаҳои биноҳои истиқоматӣ бо маркази хизматрасонию тиҷоратӣ, таваққуфгоҳи нақлиётӣ, меҳмонхона ва майдончаи варзишии кӯдакон шинос шуданд
Сарвари давлат Эмомалӣ Раҳмон дар шаҳри Хоруғ китобхонаи кӯдаконаи вилоятӣ, китобхонаи шаҳрии ба номи Ҳофизи Шерозӣ ва Маркази рушди зеҳни сунъиро ифтитоҳ намуданд
Пешвои миллат Эмомалӣ Раҳмон дар шаҳри Хоруғ Маркази фарҳангӣ, савдо ва Шурои иттифоқҳои касабаи вилоятро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар шаҳри Хоруғ чойхонаи Хатлонро ба истифода доданд