Дар Брюссел ҷаласаи Кумитаи ҳамкориҳои парлумонии Ҷумҳурии Тоҷикистон ва Иттиҳоди Аврупо баргузор гардид

ДУШАНБЕ, 01.12.2018 /АМИТ «Ховар»/. Рӯзи 29 ноябри соли 2018 дар бинои Парлумони Аврупо дар шаҳри Брюссел ҷаласаи ҳафтуми Кумитаи ҳамкориҳои парлумонии Ҷумҳурии Тоҷикистон ва Иттиҳоди Аврупо баргузор гардид.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, дар иҷлосияи мазкур Ҷумҳурии Тоҷикистонро ҳайати вакилони Маҷлиси намояндагони Маҷлиси Олӣ таҳти роҳбарии Раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба иқтисод ва молия Шариф Раҳимзода ва ҷониби Иттиҳоди Аврупоро ҳайати вакилони Парлумони Аврупо таҳти роҳбарии Ивета Григуле –Петерс, роҳбари ҳайати Парлумони Аврупо оид ба робита бо кишварҳои Осиёи Марказӣ намояндагӣ карданд.

Зимни иҷлосия масъалаҳои марбут ба ҳадафҳои афзалиятноки Стратегияи миллии рушди Ҷумҳурии Тоҷикистон барои давраи то 2030, вазъи сиёсӣ, тиҷоратию сармоягузорӣ, ислоҳоти иқтисодию иҷтимоии Тоҷикистон ва татбиқи онҳо, ҳуқуқ ва озодиҳои инсон, вазъи маъюбон дар ҷомеа, волоияти қонун ва Стратегияи ИА нисбат ба Осиёи Марказӣ мавриди баррасии ширкаткунандагон қарор гирифтанд.

Таваҷҷуҳи хоса ба масъалаҳои гуногуни байналмилалӣ ва минтақавӣ, ба монанди мубориза бо терроризм, экстремизм, вазъият дар Афғонистон ва нақши Тоҷикистону Иттиҳоди Аврупо ҷиҳати мусоидат ба рушди кишвари мазкур иброз шуд.

Ҷонибҳо мавзӯоти роҷеъ ба рушди кишоварзӣ ва ҳамкорӣ дар соҳаи муҳити зистро низ мавриди муҳокима қарор доданд.