MADE IN TAJIKISTAN. Обҳои ташнагишикани «Ҳавотоғ» ва «Лимонад №1» дар озмуни «Проэкспо-2019» дар Москва беҳтарин дониста шуданд!

ДУШАНБЕ, 23.02.2019 /АМИТ «Ховар»/. Чор корхонаи тавлидотии Тоҷикистон- «Нурфуд», «Евро Азия-2005», «Сахо К», «Тавҳид ва компания» дар Намоишгоҳи 26-уми байналмилалии маҳсулоти ғизоии «Продэкспо-2019», ки дар пойтахти Россия- шаҳри  Москва доир гардид, маҳсулоти худро муаррифӣ намуданд. Дар ин бора хабарнигори АМИТ «Ховар» Марзия САИДЗОДА  иттилоъ медиҳад.

«Продэкспо-2019» яке аз намоишгоҳҳои бузурги маҳсулоти ғизоӣ дар сатҳи ҷаҳонӣ маҳсуб ёфта, дар он беш аз 2500 ширкат аз 69 кишвари ҷаҳон, назири Россия, Тоҷикистон,  Беларус, Гурҷистон, Туркия, Қазоқистон, Ҳиндустон, Германия, Чин, Ҳолланд, Ӯзбекистон, Уругвай ва дигар давлатҳои ҷаҳон ширкат намуданд.

Дар доираи намоишгоҳи «Продэкспо-2019» ҳамзамон озмуни байналмилалии «Маҳсулоти беҳтарин-2019» баргузор гардид. Дар он маҳсулоти  корхонаи тавлидотии Тоҷикистон- ҶСП «Евро Азия-2005», аз ҷумла  обҳои ташнагишикани «Ҳавотоғ» ва «Лимонад №1» аз ҷониби ҳакамони   озмун беҳтарин дониста шуд. Ширкати «Евро-Азия -2005» бо  дипломи фахрӣ,  мукофоти «Ситораи тиллоӣ»  ва «Медали тиллоӣ»  сарфароз гаронида шуд.

Бояд тазаккур дод, ки иштироки корхонаҳои истеҳсолии Тоҷикистон дар Намоишгоҳи байналмилалии маҳсулоти ғизоии «Продэкспо-2019» бо мусоидати Палатаи савдо ва саноати Ҷумҳурии Тоҷикистон сурат гирифт.