Дар Ҳисор таҳти унвони «Хатарҳои терроризми байналмилалӣ» конференсияи илмӣ-амалӣ баргузор гардид

ҲИСОР, 04.03.2019. /АМИТ «Ховар»/.  Бо ибтикори Шӯрои ҳаракати ваҳдати миллӣ ва эҳёи Тоҷикистон дар Коллеҷи омӯзгории шаҳри Ҳисор таҳти унвони «Хатарҳои терроризми байналмилалӣ» бо иштироки донишҷӯёну омӯзгорон ва намояндагони Мақомоти иҷроияи ҳокимияти давлатии шаҳри Ҳисор конференсияи илмӣ-амалӣ баргузор гардид.

Дар конференсия омӯзгорону донишҷӯён дар мавзӯъҳои «Ифротгароӣ-хатар ба ҷомеа», «Омили калидии мубориза алайҳи экстремизм ва терроризм»,  «Роҳҳои пешгирии ифротгароӣ ва таассуб» маърӯза  намуданд.

Директори Коллеҷи омӯзгори шаҳри Ҳисор Гулхумор Дадабоева изҳор дошт, ки «роҳи давлатдорию давлатсозӣ пур аз монеаҳои сарпечида, хатарҳои сиёсӣ, мухолифатҳои сиёсии пӯшида, таҳаввулоти ногаҳонӣ ва мушкилоти дигар аст. Имрӯзҳо асоси пойдории давлат, таҳкими истиқлолият, сулҳу ваҳдат ва ягонагӣ дар кишвар аз сатҳи баланди зиракии сиёсии ҳар як сокини мамлакат вобастагии калон доранд. Аз ин рӯ ҳар яки мо бояд ба қадри сулҳу субот ва оромии мамлакат бирасем ва нагузорем, ки ҷараёнҳои ифротӣ ҳаёти осоиштаи моро халалдор намоянд».

Дар ин рӯзҳо Шӯрои ҳаракати ваҳдати миллӣ ва эҳёи Тоҷикистон дар шаҳри Ҳисор  оид ба пешгирии ҷавонон  аз ҳизбу ҳаракатҳои террористӣ дар асоси нақша дар муассисаҳои миёнаи касбӣ ва  таълимӣ, соҳаи тандурустӣ ва ҷамоатҳои шаҳраку деҳот бо ҷалби  зиёиёни шаҳр вохӯриҳо доир намуда истодааст.