Давлатҳои узви СПАД амалҳои худро зимни ҳолатҳои фавқулода ҳамоҳанг мекунанд

ДУШАНБЕ, 27.03.2019. /АМИТ «Ховар»/.  Дар Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон 26 март дар низоми иртиботи видеоӣ дар мавзӯи «Тартиби кор бо мақомоти  ваколатдори давлатии кишварҳои узви СПАД дар самти пешгирӣ ва бартарафсозии оқибатҳои ҳолатҳои фавқулода» тамрини муштарак баргузор шуд.

Тавре ба АМИТ «Ховар» аз Кумитаи мазкур хабар доданд, дар  конфронси видеоӣ Котиботи СПАД ва роҳбарони Маркази идорӣ дар вазъи буҳронӣ ва гурӯҳҳои фаврии ваколатдори мақомоти давлатии кишварҳои узви СПАД дар самти пешгирӣ ва бартарафсозии оқибатҳои ҳолатҳои фавқулода ширкат намуданд.

Ба иттилои манбаъ, иштирокдорони конфронс  низоми масъалаҳои ташкили иттилоърасонӣ ва табодули ахбор ҳангоми рух додани ҳолатҳои фавқулода миёни мақомоти ваколатдори дарвлатҳои узв, тартиби амали мақомоти салоҳиятдори кишварҳои иштирокчӣ ҳангоми вокуниш ба ҳолатҳои фавқулода, ҳамчунин таъмини расонидан, тақсим намудани воситаҳо ва воҳидҳои наҷоти мақомоти салоҳиятдори кишварҳои узви СПАД дар самти пешгирӣ ва бартарафсозии оқибатҳои ҳолатҳои фавқулодаро ба таври онлайнӣ мавриди баҳсу баррасӣ қарор доданд.