Китоби журналисти ҷавон таҳти унвони «Агар ҷавонӣ медонист…» ба табъ расид

ДУШАНБЕ, 06.03.2019. /АМИТ «Ховар»/. Дар арафаи Рӯзи матбуоти тоҷик китоби тозанашри журналисти ҷавон Башир Усмон таҳти унвони «Агар ҷавонӣ медонист…» ба табъ расид. Китоби мазкур фарогири маҷмӯи мақолаҳои муаллиф буда, ба масъалаи ҷавонон ва сатҳи донишу ҷаҳонбинии онҳо бахшида шудааст.

Муаллиф аз ҳидояту роҳнамоҳои Президенти Ҷумҳурии Тоҷикистон муҳтарам Эмомалӣ Раҳмон нисбат ба ҷавонон илҳом гирифта, дар навиштаҳояш аз ин қишри фаъоли ҷомеа даъват ба амал меорад, ки айёми ҷавонии худро бо ғафлат пушти сар накунанд ва дар дилхоҳ масъала дурандешу ботамкин бошанд, то оқибати аъмолашон ба пушаймонӣ набарад.

Ҳамчунин китоби «Агар ҷавонӣ медонист…» масъалаҳои гуногуни иҷтимоӣ, аз қабили исрофкорӣ, иффат, қаноатпешагӣ, маданияти шаҳрнишинӣ, муносибати волидон бо фарзанд, ахлоқу муҳаббат ва дигар масъалаҳои ҳаётан муҳимро дар бар мегирад, ки воқеан ҳам ҷолибу хонданист.

Мавриди зикр аст, ки «Агар ҷавонӣ медонист…» китоби 4-уми Башир Усмон мебошад.