Паҳлавонони шинохтаи тоҷик дар Мусобиқаи байналмилалии Гранд Слам Екатеринбург иштирок мекунанд

ДУШАНБЕ, 14.03.2019. /АМИТ «Ховар»/. 15-17 март дар шаҳри Екатеринбурги Федератсияи Россия мусобиқаи байналмилалии  Гранд  Слам оид ба дзюдо баргузор мешавад, ки дар он варзишгарони тоҷик ширкат мекунанд.

Дар ин бора корманди  Кумитаи миллии олимпии Тоҷикистон Умаралӣ Сафаралӣ   ба мухбири АМИТ «Ховар» хабар дода, гуфт, ки ин  сеюмин мусобиқаи Гранд Слам аст, ки соли 2019 баргузор мешавад. Дар мусобиқа иштироки 403 нафар варзишгар (233 мард, 170 зан) аз 48 давлати дунё дар назар аст. Ҷумҳурии Тоҷикистонро дар ин мусобиқаи бонуфуз  8 варзишгар – 7 нафар миёни мардон, 1 нафар миёни бонувон  намояндагӣ мекунанд.

Бояд зикр кард, ки  дар вазни -60кг Далер Қурбонҷонов ва Комрон Мамадназаров, дар вазни -66кг Давлаталӣ Назаралиев, дар вазни -73кг Сомон Маҳмадбеков ва Беҳрӯз Хоҷазода, дар вазни -100кг Саидҷалол Саидов, дар вазни +100кг Шакармамад Мирмамадов, инчунин дар вазни -57кг миёни бонувон Шоҳида Қаландарова барои ба даст овардани ҷойҳои ифтихорӣ талош мекунанд.

Ёдовар мешавем, ки  дар ду мусобиқаи Гранд Слам, ки дар Париж ва Дюсселдорф доир гардиданд, варзишгарони мо ширкат намуданд, вале аз медалҳо маҳрум монданд. Натиҷаи беҳтарро дар Гранд Слами Дюсселдорф Сомон Маҳмадбеков нишон дод. Ӯ дар вазни -73кг ҷои панҷумро ишғол кард.

Дар Гранд Слами Екатеринбург низ чун анъана ба ғолибон ва ҷоизадорон дар баробари медал ҷоизапулӣ тақдим мегардад. Барои ҷои якум 5000 доллари ИМА, барои ҷои дуюм 3000 доллар ва барои ду ҷои сеюм 1500-долларӣ пешбинӣ шудааст.

Варзишгарон ҳамчунин сазовори холҳои олимпӣ мегарданд.