Варзишгари тоҷик Шаҳриёр Даминов медали тиллои мусобиқаи Ҷоми ҷаҳон оид ба қаиқрониро соҳиб гардид

ДУШАНБЕ, 25.03.2019. /АМИТ «Ховар»/. Варзишгари тоҷик Шаҳриёр Даминов дар мусобиқаи Ҷоми ҷаҳон оид ба қаиқронӣ, ки дар Ҳиндустон доир гардид, 23 марти соли ҷорӣ дар масофаи 500 метр сазовори ҷои сеюм гардид. Инчунин, 24 март ин варзишгари маъруфи тоҷик дар масофаи 1000 метр сазовори ҷойи аввал гардида, медали тиллои мусобиқаро соҳиб шуд.

Тавре мухбири АМИТ «Ховар» Меҳрони Қурбон хабар медиҳад, мусобиқаи Ҷоми ҷаҳон оид ба қаиқронӣ барои варзишгарони тоҷик ҷиҳати иштирок дар чемпионати ҷаҳон як дарси омӯзишӣ буд. Пас аз ин ғалаба умед аст, ки Шаҳриёр Даминов дар чемпионати ҷаҳон сазовори ҷойҳои намоён мегардад.

Иштирок дар Ҷоми ҷаҳон дар Ҳиндустон барои қаиқронҳои мо аввалин мусобиқаи таҷрибавӣ қабл аз Чемпионати ҷаҳон аст, ки моҳи август дар Венгрия баргузор мегардад.

Варзишгарони мо ҳамчунин моҳи май дар ду марҳилаи Ҷоми ҷаҳон дар Полша ва Германия иштирок мекунанд.

Ёдовар мешавем, ки дар чемпионати ҷаҳон варзишгароне, ки ҷойҳои аз 1 то 5-умро ишғол менамоянд, соҳиби роҳхат ба Бозиҳои олимпии Токио-2020 мегарданд.