Ба Қонун «Дар бораи Буҷети давлатии Ҷумҳурии Тоҷикистон барои соли 2019» иловаҳо ворид шуданд

ДУШАНБЕ, 15.04.2019. /АМИТ «Ховар»/. Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров ҷаласаи навбатии иҷлосияи панҷуми Маҷлиси намояндагони Маҷлиси Олии Ҷумҳурии Тоҷикистон, даъвати панҷум баргузор гардид.

Ба АМИТ «Ховар» аз палатаи поёнии Парлумони мамлакат иттилоъ доданд, ки вакилони мардумӣ дар  иҷлосия лоиҳаи Қонуни Ҷумҳурии Тоҷикистон «Оид ба ворид намудани иловаҳо ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2019» -ро мавриди баррасӣ қарор доданд.

Зимни баромади хеш аз рӯи масъалаи мазкур Вазири молияи Ҷумҳурии Тоҷикистон Файзиддин Қаҳҳорзода ва вакили мардумӣ Тоҳир Ҷобирзода таъкид намуданд, ки лоиҳаи Қонуни мазкур бо мақсади дастгирии молистеҳсолкунандагони ватанӣ, бахусус дастгирии корхонаҳои соҳаи коркарди гандум, таъмини шароит барои рақобати солим байни чунин корхонаҳо ва амнияти озуқаворӣ дар кишвар, рушди минбаъдаи  соҳаи футбол дар Тоҷикистон, инчунин таъмини саривақтии шаҳрвандон бо шиносномаҳои хориҷӣ таҳия ва пешниҳод шудааст.

Дар фарҷом вакилони Маҷлиси намояндагон аз рӯи масъалаи баррасишавандаи рӯзнома қарори дахлдор қабул намуданд.