Даъвати баҳорӣ дар Рашту Сангвор: сафарбаркунии фарзандон ба сафи Қувваҳои мусаллаҳ вазифаи муҳимтарини волидайн аст

РАШТ, 11.04.2019. /АМИТ «Ховар»/. Дар рӯзи якуми гусели  наваскарон ба сафи Қувваҳои Мусаллаҳи Ҷумҳурии Тоҷикистон бо баргузории маросими тантанавӣ дар ноҳияи Рашт 65 нафар ва дар ноҳияи Сангвор 12 нафар ихтиёриёнро барои хизмат ба Ватану миллат сафарбар намуданд.

Муовини раиси ноҳияи Рашт Зумрад Лоиқова иброз намуд, ки «роҳнамоӣ ва сафарбаркунии фарзандон ба сафи Қувваҳои мусаллаҳи ҷумҳурӣ вазифаи муҳимтарини волидайн мебошад. Чунки Қувваҳои мусаллаҳи Тоҷикистон, ки ҳайати он дар рӯҳияи баланди ватандӯстӣ тарбия ёфта, дорои низоми қавӣ аст, такягоҳи боэътимоди давлат ва миллат мебошанд.

Манфиати давлат аз манфиати ҷомеа ва халқ сарчашма мегирад. Аз ин лиҳоз, ҳимояи манфиатҳои миллии давлат аз ҷумлаи вазифаҳои муқаддаси ҷавонони тоҷик мебошад. Аз ин хотир ҷавононро зарур аст, ки аз хизмат дар сафи  Қувваҳои мусаллаҳ худро канор нагиранд ва ба қадри тинҷию оромии кишвар ва пешрафти вазъи иқтисодии мамлакат расида,  Ватанро  ҳимоя кунанд».

Наваскарони ноҳияҳои мазкур  гуфтанд, ки «хизмат ба Модар-Ватанро вазифаи муқаддас мешуморем, зеро он рисолати бузурги ҷавонмардӣ, оини ватандорию  нангу номуси  ҳар як ҷавон ба ҳисоб меравад. Аз ин рӯ мо, ҷавонон бо ҷасорат ва мардонагии хеш дар таҳкими сулҳу суботи сартосарии Тоҷикистони азиз саҳми арзанда мегузорем».