Маркази миллии тестӣ аз тамдиди муҳлати бақайдгирӣ ва оғози азнавбақайдгирӣ хабар медиҳад

ДУШАНБЕ, 18.04.2019. /АМИТ «Ховар»/. Маркази миллии тестии назди Президенти Ҷумҳурии Тоҷикистон ба таваҷҷуҳи шахсоне, ки барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ дар соли равон аз қайд гузаштан мехоҳанд, мерасонад, ки бинобар то кунун зиёд будани хоҳишмандон дар нуқтаҳои бақайдгирӣ ва тибқи дархосту муроҷиатҳои шаҳрвандон муҳлати бақайдгирӣ (марҳалаи асосӣ) то 30 апрел тамдид карда шуд.

Тавре аз Маркази миллии тестӣ ба АМИТ «Ховар» хабар доданд, тибқи муҳлати муқарраршуда аз 16 то 30 апрел марҳалаи асосии азнавбақайдгирии довталабон баргузор мегардад. Яъне ҳамзамон аз 16 то 30 апрел раванди бақайдгирӣ ва азнавбақайдгирӣ ба роҳ монда мешавад.

Ба иттилои манбаъ, довталабоне, ки аз қайд гузаштаанду хоҳиши иваз кардани интихобҳои аввалин (аз ҷумла, гурӯҳи ихтисосҳо, комбинатсияи ихтисосҳо, бартарии интихоби комбинатсияи ихтисосҳо, забон ё макони имтиҳонсупорӣ), маълумоти шахсии худро доранд, бояд ба нуқтаи бақайдгирие, ки қаблан дар он сабти ном шуда буданд, муроҷиат карда, ҳуҷҷатҳои заруриро пешниҳод намоянд.