Дар Душанбе роҳбарони ширкатҳои ҳавопаймоии Осиёи Марказӣ ҷамъ меоянд

ДУШАНБЕ, 11.05.2019/АМИТ «Ховар»/. 13-уми май шаҳри Душанбе мизбони нахустин вохӯрии роҳбарони ширкатҳои ҳавопаймоии Осиёи Марказӣ оид ба масоили рушди авиатсияи граждании минтақа  мегардад. Вохӯрии мазкур бо ибтикори ширкати ҳавопаймоии «Сомон Эйр» дар ҳамкорӣ  бо Агентии авиатсияи граждании назди Ҳукумати Ҷумҳурии Тоҷикистон ва Ассосиатсияи байналмилалии нақлиёти ҳавоӣ (IАТА) гузаронида мешавад. Дар ин хусус ба АМИТ «Ховар» аз ширкати ҳавопаймоии «Сомон Эйр» иттилоъ доданд.

Тибқи хабари манбаъ вохӯрии мазкур  дар силсилаи вохӯриҳои банақшагирифта нахустин иқдом буда барои баррасии мушкилоти минтақавӣ, ки садди рушди авиатсияи граждании минтақа гардидаанд, ҳамчунин роҳандозии иқдомҳои муштараки ширкатҳои ҳавопаймоӣ, ҳукуматҳои кишварҳо ва ҷонибҳои дигари ба рушди минбаъдаи авиатсияи граждании Осиёи Марказӣ мароқдошта бобати афзоиши гардиши мусофирон, васеъкунии парки ҳавопаймоӣ ва шабакаи парвозҳо имконият фароҳам меорад.

Иштирокдорони вохӯрӣ ҳамзамон шарҳи афзалиятҳои ҷории авиатсияро дар минтақа ва дурнамои иқтисодиро барои солҳои наздик, «танзими оқилона» ва татбиқи он дар кишварҳои Осиёи Марказӣ, ҷанбаҳои бехатарии парвозҳо, воридсозии аудити бехатарии истифодабарии IATA (IOSA)-ро ба танзими миллӣ, навигатсияи ба нишондиҳандаи иқтидорҳо асосёфта, таъмини устувори сӯзишворӣ, таҳлили пардохтҳои фурудгоҳӣ дар минтақа ва масъалаҳои дигарро муҳокима хоҳанд кард. Интизор меравад, ки  дар вохӯрӣ роҳбарони ширкатҳои ҳавопаймоии «Сомон Эйр» (Тоҷикистон), «Эйр Астана» (Қазоқистон), «SCAT» (Қазоқистон), «QAZAQ Air» (Қазоқистон), «Uzbekistan Airways» (Ӯзбекистон) ва «Авиа Траффик» (Қирғизистон) ширкат варзида, намояндагони Ассосиатсияи байналмилалии нақлиёти ҳавоӣ ба ҳайси нозирону коршиносон ҳузур хоҳанд дошт.

Ташаббускори вохӯрии мазкур — ширкати ҳавопаймоии «Сомон Эйр» алҳол муваффақона парвозҳоро аз Тоҷикистон ба Олмон, Амороти Муттаҳидаи Араб,  Туркия, Чин,  Россия, Қазоқистон ва Ӯзбекистон анҷом медиҳад. Парки ҳавопаймоии ширкат аз ҳавопаймоҳои навъи Боинг 737-300, 800 ва 900 иборат мебошад.