Рамазон Раҳимзода ва Педро Серрано масъалаҳои ҳамкорӣ дар мубориза бар зидди ҷинояткориро баррасӣ намуданд

ДУШАНБЕ, 16.05.2019./АМИТ «Ховар»/. 16 май Вазири корҳои дохилии Ҷумҳурии Тоҷикистон Рамазон Раҳимзода бо муовини Котиби генералӣ оид ба сиёсати умумии амният ва мудофиа, эътино ба ҳолатҳои буҳронии хадамоти аврупоии робитаҳои берунӣ Педро Серрано мулоқот намуд.

Тавре аз Вазорати корҳои дохилӣ ба мухбири АМИТ «Ховар» хабар доданд, зимни вохӯрӣ Вазири корҳои дохилӣ Рамазон Раҳимзода  изҳор дошт, ки вохӯрии имрӯза самарабахш буда, қадами устуворе дар ҳамкории минбаъда хоҳад буд.

Зикр гардид, ки Конвенсияи аврупоӣ оид ба пешгирии терроризм, ки соли 1977 дар Страсбург ба имзо расидааст, аз ҷониби Ҷумҳурии Тоҷикистон тасдиқ гардида, дар доираи он ҳамаи масъалаҳои ҳамкорӣ дар соҳаи мазкур бо Иттиҳоди Аврупо баррасӣ карда мешаванд.

Ба иттилои манбаъ, дар ҷараёни вохӯрӣ ҷонибҳо масъалаҳои таъмини амният ва ҳамкориро дар мубориза бар зидди ҷинояткорӣ баррасӣ намуда, ҷиҳати рушду густариш додани ҳамкории мутақобилан судманд таклифу пешниҳодҳои ҷолиб баён намуданд.