Роҳбарони мақомоти ҳарбии давлатҳои иштирокчии СААД вазъи муташанниҷи сарҳади Тоҷикистону Афғонистонро баррасӣ намуданд

ДУШАНБЕ, 02.05.2019 /АМИТ «Ховар»/. Дар Бишкек нишасти вазирони мудофиаи давлатҳои иштирокчии  СААД баргузор гардид. Намояндагони Арманистон, Беларус, Қазоқистон, Қирғизистон, Россия ва Тоҷикистон мубодилаи афкор оид ба масъалаҳои даъват ва таҳдидҳо дар Осиёи Марказиро баррасӣ намуда,  инчунин масоили ташкили амалкарди якҷоя дар самти коҳиши фишорҳо дар ҳудуди сарҳади Тоҷикистону Афғонистонро мавриди таҳлил қарор доданд, Дар ин бора АМИТ «Ховар» бо такя ба хабари Кумитаи иҷроияи ИДМ иттилоъ медиҳад.     

Бино ба иттилои Маркази матбуоти ситоди генералии Қирғизистон, сарони идораҳои мудофиавӣ ҳамчунин як зумра ҳуҷҷатҳо, аз қабили омодасозии мақомоти идоракунӣ, ташкили қувва ва воситаҳои низомҳои амнияти дастаҷамъӣ  барои соли оянда, нақшаи машваратҳо оид ба масоили сиёсати хориҷӣ, амният ва мудофиаро баррасӣ намуданд.

Ҳамзамон иштирокчиёни ҷаласаро Президенти Қирғизистон Сооронбой Жээнбеков ба ҳузур пазируфт.

«Дар назди давлатҳои мо вазифаҳои басо муҳим оид ба таъмини амнияти давлатӣ меистанд. Қирғизистон  дар чаҳорчӯби Созмони Ҳамкории Шанхай, ИДМ ва СААД ба масъалаҳои ҳалли минбаъдаи ҳамгироии минтақавӣ аҳамияти аввалиндараҷа медиҳад.

Бо мақсади таъмини амнияти дастаҷамъӣ Қирғизистон минбаъд низ барои беҳтар кардан ва пурра намудани ин самти кор ташаббусҳои худро идома хоҳад дод. Авлавияти эълоншудаи раисии мо низ ба тақвияти масоили амниятӣ равона гардидааст», — афзуд роҳбари ин мамлакат.

Вазири мудофиаи Беларус Андрей Равков аз номи иштирокдорони ҷаласаи вазирони мудофиаи СААД ба Президенти Қирғизистон барору комёбӣ таманно намуд.

Дар охири ҷаласа Сооронбой Жээнбеков боварии хешро ҷиҳати муваффақона гузаронидани чорабиниҳои давоми соли равон дар назар дошта изҳор намуда, ба иштирокчиён дар таҳия ва таҳкими кори созмон комёбӣ таманно намуд.