Ташкили гӯшаи зиндаи ҳайвоноту парандаҳо барномаи идонаи кӯдакони вилояти Суғдро рангинтар месозад

ДУШАНБЕ, 30.05.2019 /АМИТ «Ховар»/. 1 июни соли равон  бахшида ба Рӯзи байналмилалии ҳифзи кӯдакон дар Боғи фарҳангию фароғатии «Наврӯзгоҳ»—и  шаҳри Хуҷанди вилояти Суғд барномаи  идона баргузор мешавад.

Дар боғи мазкур  гӯшаи зиндаи ҳайвоноту парандаҳои гуногун, гӯшаҳои саломатӣ ва аёниятҳои таблиғи тарзи ҳаёти солим,  инчунин техникони наврас  ташкил мегардад. Дар барномаи идона кӯдакону наврасон,  хонандагони беҳтарин аз шаҳру ноҳияҳо, ятимони кулл ва тарбиятгирандагони муассисаҳои иҷтимоии вилоят  иштирок менамоянд.

Дар ин бора аз Хадамоти матбуотии Раиси вилояти Суғд ба АМИТ «Ховар» хабар доданд.

Ба иттилои манбаъ,  дар  макони баргузории чорабинӣ ташкили  барномаҳои фарҳангии тарбиятгирандагони  кӯдакистонҳо  ва бозиҳои гуногуни  варзишӣ дар назар дошта шудааст.  Дар  барномаи фарҳангӣ  маҳсули меҳнати дастии хонандагони  вилоят – ғолибон ва иштирокдорони озмунҳои «Техникони наврас», «Бозёфт», «Дастони моҳир», «Шаҳри ояндаи ман», «Ихтироъкори беҳтарин», аъзои маҳфилҳои адрасбофӣ, гилембофӣ ва гулдӯзӣ ба намоиш гузошта мешавад.Хамчунин пешниҳоди рақсу таронаҳои ҷолиб хотири бачаҳоро болида  мегардонад.