Шамсиддин Орумбекзода: Бахшида ба ҷашни 30-солагии Истиқлолияти давлатӣ сохтмону навсозии муассисаҳои фарҳангӣ идома дорад

Июль 26, 2019 13:05

ДУШАНБЕ,  26.0.2019. /АМИТ «Ховар»/. Вазорати фарҳанги Ҷумҳурии Тоҷикистон дар доираи омодагиҳо ба ҷашни 30-солагии Истиқлолияти давлатии Ҷумҳурии Тоҷикистон ва Солҳои  рушди деҳот, сайёҳӣ ва ҳунарҳои мардумӣ  имрӯзҳо дар шаҳру ноҳияҳои ҷумҳурӣ бунёди як зумра иншооти фарҳангиро ба нақша гирифтааст. Ин матлабро Вазири фарҳанги Ҷумҳурии Тоҷикистон Шамсиддин Орумбекзода имрӯз, 26 июл зимни баргузории нишасти матбуотӣ баён дошт.

Ба зикри номбурда, дар айни замон корҳои сохтмонӣ дар муассисаҳои фарҳанги ноҳияҳои Мастчоҳ, Шаҳринав, Нуробод ва Данғара идома дошта, сохтмони Қасри фарҳанги ноҳияи Шамсиддин Шоҳин аз тарафи Дирексияи сохтмони иншооти ҳукуматӣ ба анҷом расонида шуд. Моҳи марти соли равон дар ноҳияҳои Бобоҷон Ғафуров ва Спитамен қасрҳои фарҳанг бунёд гардида, мавриди истифода қарор дода шуданд.

Ба иловаи Вазири фарҳанг, дар ҷумҳурӣ корҳои тармим ва барқарорсозии ёдгориҳои таърихию фарҳангӣ низ тибқи Нақшаи чорабиниҳои «Барномаи давлатии ҳифз ва истифодаи мероси таърихию фарҳангӣ барои солҳои 2012-2020» ба анҷом расонида мешавад.
«Тибқи нақшаи мазкур барои соли равон тармим ва барқарорсозии ёдгориҳои меъмории Қалъаи Ҳулбук, Қалъаи Муъминобод, барқарорнамоии Мақбараи Шоҳи Хомўш, барқарорнамоии Мақбараи Хоҷаи Заррин, тармими Масҷиди Далёни Боло, тармими Мадрасаи Абдуллохон, Қалъаи Вамар ва таҳқиқҳои бостоншиносӣ дар ёдгориҳои бостони Ҳулбук, Ямчун, Мадрасаи Хоҷа Машҳад ба нақша гирифта шудааст», -афзуд Шамсиддин Орумбекзода.

Ба иловаи Вазири фарҳанг, амалӣ намудани корҳои тармим ва барқарорсозии ёдгориҳои таърихию фарҳангӣ ба нақшаи Барнома ворид гардида, инчунин дар ҷумҳурӣ аз ҷониби Муассисаи давлатии «Иттиҳодияи илмӣ-истеҳсолӣ оид ба ҳифзу тармим ва барқарорсозии ёдгориҳои таърихию фарҳангӣ»-«МДМЁ»-и Вазорати фарҳанги Ҷумҳурии Тоҷикистон ба анҷом расонида мешавад.

«Корҳои тармим ва барқарорсозӣ дар ёдгории меъмории «Қасри Ҳоким»-и шаҳри Ҳисор, ки тибқи лоиҳаи «Барқарорнамоии ёдгориҳои шаҳри Ҳисор вобаста ба ҷашни 3000-солагии Ҳисор» амалӣ мегарданд, дар давраи соли равон вобаста ба имкониятҳои молиявӣ  мавқуф гузошта шудааст», -гуфт Шамсиддин Орумбекзода.

Мавсуф изҳор дошт, ки новобаста ба маҳдуд намудани норасоии воҳидҳои корӣ дар самти ҳифз ва истифодаи мероси таърихию фарҳангӣ дар маҳалҳо тибқи қарори ҳайати мушовараи Вазорати фарҳанг аз ҳисоби маъмурияти муассисаҳои зертобеи вазорат ба таври сарборӣ нозирони минтақавӣ дар водии Зарафшон, ноҳияҳои тобеи ҷумҳурӣ, минтақаи Қӯрғонтеппаи вилояти Хатлон, минтақаи Кӯлоби вилояти Хатлон ва ноҳияҳои кӯҳистони вилояти Хатлон таъйин гардида, ҳифзи мероси ғайриманқули мамлакатро ба таври ҷамъиятӣ таъмин менамоянд.

 

Июль 26, 2019 13:05

Хабарҳои дигари ин бахш

Антропологи машҳури рус дар ёдгории Сари Майни ноҳияи Айнӣ таҳқиқот мегузаронад
НИШАСТҲОИ МАТБУОТӢ. 21 июл дар вазорату идораҳои Тоҷикистон нишастҳои матбуотӣ оғоз мегарданд
«Қалъаи Хуҷанд» ба рӯйхати 10 мавзеи ҷолиби сайёҳии Тоҷикистон шомил гардидааст
Дар мавзеи Сари Майни ноҳияи Айнӣ корҳои омӯзишии бостоншиносӣ ва антропологӣ оғоз ёфт
Санъаткорони Қирғизистон Осорхонаи миллии Тоҷикистонро тамошо карданд
Дар Душанбе бо мақсади рушди ҳамкорӣ дар самти илмҳои яхшиносӣ вохӯрӣ баргузор гардид
Ба Маркази мероси хаттӣ беш аз 100 нусха китобҳои чопи сангӣ ва дастнависҳо тақдим гардид
«ШОҲНОМА». Фирдавсӣ дар сар то сари ин асари безавол дӯст доштани Ватанро таъкид мекунад
Беш аз 23 ҳазор нусха китобҳои Китобхонаи миллии Тоҷикистон ба шаҳру ноҳияҳои ҷумҳурӣ фиристода шуд
«ДӮСТИИ АБАДӢ». Таҳту чунин унвон барномаи фарҳангии Тоҷикистон ва Қирғизистон доир мегардад
Собиқ Вазири фарҳанги Ҷумҳурии Тоҷикистон Тамара Абдушукурова аз олам даргузашт
Ҷаласаи вазирони фарҳанги давлатҳои аъзои Созмони ҳамкории Шанхай доир гардид