ТАМУЗИ* ТОБИСТОН! Моҳи июл дар Тоҷикистон ҳавои гарму тафсон боқӣ мемонад

Июль 6, 2019 09:21

ДУШАНБЕ, 06.07.2019 /АМИТ «Ховар»/. Тибқи пешбиниҳои мутахассисони Маркази обуҳавосанҷии  Кумитаи ҳифзи муҳити зисти назди Ҳукумати Ҷумҳурии Тоҷикистон, моҳи июл дар ҷумҳурӣ ҳарорати ҳаво гарму тафсон боқӣ мемонад.

Бино ба иттилои номбурда, ҳарорати рӯзонаи ҳаво давоми моҳ дар водиҳои вилояти Хатлон ва  ноҳияҳои тобеи марказ ба  35-40 дараҷа мерасад. Дар ҷануби вилояти Хатлон 42-43 дараҷа гармӣ дар назар буда, ҳарорати ҳаво дар минтақаҳои кӯҳӣ рӯзона аз 28 то 33 ва дар баъзе минтақаҳо то 35 дараҷа мерасад.

Дар ин моҳ боришоти зиёд пешгӯӣ намешавад. Танҳо дар минтақаҳои кӯҳӣ аз меъёри муқаррарӣ каме бештар борон меборад меборад,- мегӯяд Фаридун Аҳмадзода.

Ба зикри сардори шуъбаи пешгӯии боду ҳавои Агентии обуҳавошиносии Тоҷикистон, тибқи пешбиниҳои дарозмуддат моҳи июли имсола на он қадар гарм шуда, мувофиқ ба моҳи июли  соли 2004 мебошад.

Давоми моҳи июл ҳангоми ноустувор шудани ҳаво шамол шуда, чангу ғубор ба амал меояд. Шиддати шамол  дар баъзе минтақаҳои вилояти Хатлон ва ноҳияҳои тобеи марказ то 17-22 метр дар як сония мевазад.

Мувофиқи иттилои муттахассисони соҳаи тандурустӣ, гармии зиёд ба кӯдакон ва пиронсолоне, ки  ба бемориҳои узвҳои нафаскашӣ ва системаи дилу рагҳо мубтало мебошанд, таъсири худро мерасонад. Аз ин сабаб ҳангоми  баланд шудани ҳарорати ҳаво ба сокинони  мамлакат тавсия дода мешавад, ки  дуру дароз зери шуоъҳои баланди  офтоб наистанд. Зеро онҳо метавонанд ба бемории гармозадагӣ гирифтор шаванд. Инчунин дар ҳавои гарм зери шуои офтоб зиёд истодан ба сӯхтани пӯсти бадани инсон, пайдоиши обилачаҳо ва дарди сару дилбеҳузурӣ оварда мерасонад.

Ҳамчунин мутахассисон иброз медоранд, ки  ҳарорати баланди ҳаво барои гирифторони бемории диабети қанд ва фишорбаландӣ  мушкилӣ пеш меорад. Зеро дар ҳарорати баланд арақкунии бадан зиёд гардида, дар натиҷа консентратсияи қанди хун баланд мешавад. Аз ин рӯ аз  аҳолии мамлакат хоҳиш карда мешавад, ки  ҳангоми баланд будани ҳарорати ҳаво аз соати 11:00 то 17:00 бе зарурат  дар берун сайругашт накунанд. 

*Тамуз дар «Фарҳанги забони тоҷикӣ» (иборат аз ду ҷилд, Москва, 1969) чунин тафсир ёфтааст: 1. Моҳи даҳуми сурёнӣ, ки ба моҳи июл рост меояд. 2. Тобистон; гармои тобистон

Июль 6, 2019 09:21

Хабарҳои дигари ин бахш

«ҲИМОЯИ АРЗИШҲОИ МИЛЛӢ ДАР РАВАНДИ ҶАҲОНИШАВӢ». Таҳти ин унвон дар ноҳияи Муъминобод ҳамоиши илмиву маърифатӣ баргузор шуд
25 нафар занону духтарони ВМКБ ба курси «Зан – сарвар» ҷалб гардиданд
ИМРӮЗ — РӮЗИ УМУМИҶАҲОНИИ САЛИБИ СУРХ ВА ҲИЛОЛИ АҲМАР. Ҷамъияти Ҳилоли Аҳмари Тоҷикистон беш аз 12 ҳазор волонтёрро муттаҳид месозад
МАСЛИҲАТИ МУТАХАССИС. Инсон бояд дар як шабонарӯз аз 25 то 50 грамм фалла (творог) истеъмол намояд
«МО БА ШУМО ЭҲТИРОМ ДОРЕМ!». Дар ноҳияи Рӯдакӣ ба иштирокчии Ҷанги дуюми ҷаҳонӣ туҳфаҳои Пешвои миллат расонида шуданд
Дар ноҳияи Ҳамадонӣ доир ба ҳимояи арзишҳои миллӣ дар раванди ҷаҳонишавӣ мулоқот доир гардид
Дар ноҳияи Сангвор ба иштирокчии Ҷанги дуюми ҷаҳонӣ Достӣ Умедов туҳфаҳои Сарвари давлат супорида шуданд
Дар шаҳри Норак ба гиромидошти хотираи неки собиқадорони Ҷанги дуюми ҷаҳонӣ ҳамоиши тантанавӣ доир шуд
Ҷараёни татбиқи «Барномаи миллии ҳимояи аҳолӣ аз бемории сил дар Ҷумҳурии Тоҷикистон барои солҳои 2021-2025» баррасӣ гардид
Оқибатҳои офати табиӣ дар шоҳроҳи байналмилалии «Душанбе–Турсунзода» бартараф мегарданд
Борону селҳои шабонарӯзи гузашта сабаби харобиҳо дар минтақаҳои Тоҷикистон шуданд
Дар ноҳияи Ашт иштирокчиёни Ҷанги дуюми ҷаҳониро аёдат намуданд