Дар арафаи соли нави хониш боз як дабистон дар Душанбе дари худро ба рӯи толибилмон боз кард

Август 30, 2019 17:26

ДУШАНБЕ, 30.08.2019. /АМИТ «Ховар»/. Имрӯз бо иштироки Раиси шаҳри Душанбе Рустами Эмомалӣ бинои нави муассисаи таҳсилоти миёнаи умумии №11-и ноҳияи Исмоили Сомонии шаҳри Душанбе мавриди баҳрабардорӣ  қарор дода шуд. Ин муассисаи таълимӣ дар маҷмӯъ барои 1280 нафар хонанда, дар як баст пешбинӣ шудааст.  Мактаби нав аз таҳхона ва се ошёна иборат буда, шумораи умумии синфхонаҳои он  ба 32 адад мерасад. Утоқҳои роҳбарият ва омӯзгорон, инчунин синфхонаҳои фаннӣ, омӯзиши забонҳои хориҷӣ ва таълими касбу ҳунар барои духтарону писарон, кабинетҳои лингофонӣ, маҷлисгоҳ бо 144 ҷойи нишаст, ошхона бо 80 ҷойи нишаст ва утоқи либосовезии хонандагону омӯзгорон бо асбобу лавозимоти зарурӣ таъмин карда шудаанд.

Барои омӯзиши санъати тасвирӣ  синфхонаи махсус  ҷудо гардидааст, ки дар он   тамоми таҷҳизоти  тадрисӣ фароҳам оварда шудааст.

Дар синфхонаҳои таълими меҳнат, ки бо тамоми асбобу аёнияти зарурӣ муҷаҳҳаз гардидаанд, мутахассисони соҳибтаҷриба ба хонандагон нозукиҳои касбҳои дуредгарӣ, кандакорӣ, дӯзандагӣ  ва тарзи омода намудани ҳар гуна таомҳоро меомӯзонанд.

Роҳрав ва синфхонаҳои таълимӣ бо камераҳои мушоҳидавии дорои сифати баланд ва лавҳаҳои электронию технологияҳои муосири иттилоотию коммуникатсионӣ муҷаҳҳаз мебошанд. Ин имконият медиҳад, ки раванди таълим пурра таҳти назорат қарор гирифта шуда, омӯзгорон масъулиятшинос бошанд. Аз ҷониби дигар, он ба волидайн имкон фароҳам меорад, ки аз ҷараёни таълиму тарбия, рафтор ва одобу ахлоқи фарзандонашон дар мактаб  пайваста огоҳӣ дошта бошанд.

Бо мақсади ҳифзи солимии омӯзгорону толибилмон дар бинои навбунёд маркази тиббӣ ҳам бунёд ёфта, он бо ҷиҳози зарурии кумаки аввалини тиббӣ муҷаҳҳаз шудааст.

Бинои нави таълимӣ дар асоси дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби соҳибкори  ватанӣ Изатулло Давлатов бунёд гардидааст.

Иншооти мазкур дар доираи амалисозии марҳилаи дуюми лоиҳаи бунёди ин муассисаи таълимӣ сохта шуда, бинои аввали он  14 августи соли 2018 бо иштироки Раиси шаҳри Душанбе  мавриди баҳрабардорӣ қарор гирифта буд.

Зимни шиносоӣ бо шароити таълим  дар ин мактаб Раиси шаҳри Душанбе ба сифати корҳои анҷомдодашуда баҳои баланд дода, таъкид намуд, ки дар баробари корҳои сохтмонӣ дар иншооти соҳаи маориф ба масъалаи истифодаи воситаҳои муосири таълимӣ низ эътибори махсус  дода шавад.

Раиси шаҳр омӯзиши фанҳои дақиқ ва омода намудани мутахассисони баландихтисосро муҳим арзёбӣ намуда, дастур дод, ки дар раванди таълим  ба баланд бардоштани савияи илмомӯзии хонандагон аҳамияти ҷиддӣ дода шавад.

Рустами Эмомалӣ  масъулинро вазифадор намуд, ки бо дарназардошти рушду пешрафти ҷаҳони имрӯза тавассути гузаронидани таҳлилу омӯзиши амиқ,   тамоми муассисаҳои таълимии пойтахт бо дастгоҳу таҷҳизоти ба талаботи замон ҷавобгӯи сохту истеҳсоли корхонаҳои  ватанӣ таъмин карда шаванд. Зеро чунин тадбир ҳам дар самти дастгирии истеҳсолоти ватанӣ мусоидат  карда, нисбат ба маводи воридотӣ  арзон  мебошанд.

Дар саҳни муассисаи таълимӣ Раиси шаҳри Душанбе  таваҷҷуҳи  масъулинро ба ороиш ва тарҳи роҳрав, гулдонҳои сатҳӣ, хусусан ободонӣ ва  сабзазоркунии майдони назди бинои таълимӣ ҷалб намуд. Онҳоро муваззаф намуд, ки дар баробари гулу майса, ҳамчунин ба шинондани дарахтони сояафкану ороишӣ таваҷҷуҳ  зоҳир намоянд.

Раиси шаҳр баланд бардоштани сатҳи таълиму тарбияи насли наврас, тарбия  намудани онҳоро  дар рӯҳияи ватандӯстиву ватанпарастӣ, инчунин арҷгузорӣ ба арзишҳои миллию  давлатӣ аз вазифаҳои аввалиндараҷаи кормандони соҳаи маорифи шаҳри Душанбе маънидод намуд.

Август 30, 2019 17:26

Хабарҳои дигари ин бахш

Дар ноҳияи Фирдавсии шаҳри Душанбе марказҳои хизматрасонӣ ба истифода дода шуданд
ФАРҲАНГ ДАР РУШДИ ИНСОН МАҚОМИ АРЗАНДА ДОРАД. Муовини Раиси шаҳри Душанбе Мавсума Муинӣ доир ба афзалияти соҳаи фарҳанги пойтахт ибрози андеша намуд
Доир ба имконоти сайёҳӣ, заминаҳои воқеӣ ва дурнамои рушди шаҳри Душанбе ҳамоиш доир шуд
Ба 2500 нафар кӯдакони ятиму бепарастори пойтахт аз номи Раиси шаҳри Душанбе Рустами Эмомалӣ туҳфаҳои солинавӣ тақдим гардиданд
Ба зиёда аз 11 ҳазор нафар ниёзмандон кумакҳои Раиси шаҳри Душанбе Рустами Эмомалӣ тақдим шуданд
Имрӯз дар пойтахт Иҷлосияи ҳаштуми Маҷлиси вакилони халқи шаҳри Душанбе, даъвати шашум баргузор гардид
Дар Душанбе барномаҳои фарҳангии солинавӣ дар доираи маҳдуд гузаронида мешаванд
Дар Душанбе бахшида ба Соли нав ярмаркаҳои фурӯши маҳсулоти мавриди ниёзи аввал ташкил шудаанд
Дар Душанбе даври шаҳрии озмунҳои «Мураббии сол-2021», «Омўзгори сол-2021» ва «Хонандаи сол-2021» баргузор мегардад
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар ноҳияи Синои пойтахт якчанд иншоот ба истифода дода шуд
«ДУШАНБЕ — ПОЙТАХТИ ФАРҲАНГИИ ИТТИҲОД-2021». Имрӯз дар Театри давлатии академии опера ва балети Тоҷикистон маросими натиҷагирӣ аз тадбирҳои андешидашуда доир гардид
«ДУШАНБЕ – ПОЙТАХТИ ФАРҲАНГИИ ИДМ-2021». Пагоҳ маросими расмии натиҷагирӣ аз тадбирҳои андешидашуда доир мегардад