Дар ярмаркаи мактабии шаҳри Конибодом либосҳои «Маликабону», «Имдоди Ғайрат», «Фаррух», «Зайнаб», «Гулдаст» ва «Ниҳол» ба фурӯш гузошта мешаванд

ХУҶАНД, 14.08.2019. /АМИТ «Ховар»/. Пагоҳ, 15 август бо ташаббуси  мақомоти иҷроияи ҳокимияти давлатии шаҳри Конибодом дар маркази шаҳр бо мақсади таъмини хонандагони муассисаҳои таҳсилоти умумӣ бо ашёи хониши таълимӣ ва либоси ягонаи мактабии истеҳсоли коргоҳҳои ватанӣ ярмаркаи лавозимоти мактабӣ доир мегардад. Дар робита ба ин имрӯзҳо масъулини сохторҳои марбута, аз ҷумла коргоҳҳои дӯзандагии шаҳр омодагии ҷиддӣ дида истодаанд.

Тавре масъули бахши иттилооти мақомоти иҷроияи ҳокимияти давлатии шаҳри Конибодом Парвина Абдуллоева ба хабарнигори минтақавии АМИТ «Ховар»  иттилоъ дод,   имсол дар ярмаркаи мактабӣ либосҳои коргоҳҳои дӯзандагии шаҳр, чун «Маликабону», «Имдоди Ғайрат», «Фаррух», «Зайнаб», «Гулдаст» ва «Ниҳол», ки бо пешниҳоди дӯхти босифат, дизайни муосир ва арзиши дастрас дар бозори маҳаллӣ мавқеи устувор пайдо намудаанд, ба фурӯш гузошта мешаванд.

Барои таъмини хонандагони муассисаҳои таҳсилоти  умумии шаҳр  бо либоси ягонаи мактабӣ миёни шуъбаи маорифи шаҳр ва ин коргоҳҳо барои омода намудани 22 424 ҷуфт либоси мактабӣ шартномаи тарафайн баста шудааст. Ба иттилои манбаъ, то 10 август 12 ҳазор ҷуфт либос омода ва дастраси мактабиён гардидааст, ки ин 60 фоизи нақшаро ташкил медиҳад.

Ҳамзамон вобаста ба тайёрии муассисаҳои таълимии шаҳр ба соли хониши 2019-2020 иттилоъ дода шуд, ки то 8 август  кулли муассисаҳои таълимӣ аз таъмири ҷорӣ бароварда шуда,  танҳо   сохтмони  ҳашт синфхона ва ду кабинети корӣ дар назди муассисаи таълимии рақами №47, чор синфхона дар мактаби №45, панҷ синфхона ва маҷлисгоҳ дар мактаби №53, толори варзишӣ дар назди мактаби №44, ду устохонаи таълимӣ, ошхона ва майдончаи варзишӣ дар гимназияи шаҳрӣ, сохтмони биноҳои нави таълимӣ барои 330 ҷойи нишаст ва 240 ҷойи нишаст дар назди мактабҳои №7 ва №52    дар марҳилаи    анҷом  қарор дорад. Дар назар аст, ки иншооти зерин дар рӯзҳои   оғози    соли нави таҳсили   2019-2020 мавриди истифода қарор дода шаванд.

Ҳоло дар шаҳри Конибодом 55 муассисаи таълимии таҳсилоти умумӣ, аз ҷумла як муассисаи таҳсилоти умумии асосӣ, 51 муассисаи таҳсилоти умумии миёна, як литсей, як гимназия, як муассисаи таҳсилоти умумии хусусӣ бо фарогирии беш аз 30 ҳазор хонанда ва зиёда аз 2400 нафар омӯзгорон фаъолият доранд.

Тибқи иттилои пешакии масъулини шуъбаи маорифи шаҳр, дар соли таҳсили 2019-2020 қабули қариб 3500 нафар толибилмон ба синфи якум дар назар аст.