Идигул Қосимзода: «Дар назди бахшҳои кор бо занони шаҳру ноҳияҳо марказҳои иттилотӣ-машваратӣ кушода шуданд»

ДУШАНБЕ, 1.08.2019. /АМИТ «Ховар»/. Бо мақсади таъмини ҳуқуқҳо ва кафолати баробарии воқеии мардону занон, пешгирии зӯроварӣ дар оила ва додани маслиҳатҳои равонӣ ба занон дар назди шуъба ва бахшҳои кор бо занони мақомоти иҷроияи ҳокимияти давлатии шаҳру ноҳияҳои ҷумҳурӣ 110 маркази иттилотӣ-машваратӣ фаъол гардиданд. Ин нуктаро имрӯз Раиси Кумитаи кор бо занон ва оилаи назди Ҳукумати Ҷумҳурии Тоҷикистон Идигул Қосимзода ба суоли хабарнигори АМИТ «Ховар» ҷиҳати  бо равоншиносон таъмин будани шуъба ва бахшҳои кор бо занони шаҳру ноҳияҳо баён дошт.

«Бо вуҷуди ташкил гардидани ин марказҳо мавридҳое ҳастанд, ки дар минтақаҳои кӯҳистон равоншиносон намерасанд. Дар ин ҳолатҳо мутахассисон аз кумита рафта, бо муроҷиаткунандагон суҳбат ороста, ба онҳо маслиҳатҳои равонию ҳуқуқӣ медиҳанд»-баён дошт Идигул Қосимзода.

Ба зикри номбурда, дар ин марказҳо як нафар ҳуқуқшинос ва як нафар равоншинос фаъолият намуда, онҳо аз буҷети маҳаллӣ маблағгузорӣ мегарданд.

«Ҳукумати Тоҷикистон ба масъалаи дастгирии занону духтарон аҳамияти хосса дода, ин иқдомро ба яке аз самтҳои муҳими сиёсати иҷтимоии давлат табдил додааст. Ташкили марказҳои иттилоотӣ-машваратӣ низ яке аз тадбирҳои нек дар самти дастгирии занону бонувон ба шумор меравад»,-иброз намуд Идигул Қосимзода.

Мавсуф иброз дошт, ки тибқи маълумоти оморӣ, дар шаш моҳ ба марказҳои иттилоотӣ-машваратӣ қариб ҳафт ҳазор шаҳрванд муроҷиат кардаанд, ки аз ин шумора қариб 5 ҳазорашро занон ва боқимондаро мардон ташкил медиҳанд.

Ба иттилои номбурда, теъдоди зиёди ин муроҷиатҳо ба маслиҳатҳои равоншиносон вобаста буда, қисми дигари онҳо ба ҳуқуқшиносон дахл доранд.

Инчунин дар назди Кумита таълимгоҳи «Чароғи ҳидоят» мавҷуд аст, ки қариб сад нафар духтарон дар он ба тарбия ва касбомӯзӣ фаро гирифта шудаанд. Дар баробари ин равоншинос Маҳмадулло Давлатов дар ин таълимгоҳ ба кор ҷалб шудааст.