Машқҳои муштараки амалиётӣ-стратегии зиддитеррористӣ дар ноҳияи Шуғнон ҷамъбаст ва натиҷагирӣ шуданд

Август 14, 2019 15:45

ДУШАНБЕ, 14.08.2019 /АМИТ «Ховар»/.  Имрӯз, 14 август  дар машқгоҳи ҳарбии Ҷелондии ҳудуди ноҳияи Шуғнони Вилояти Мухтори Кӯҳистони Бадахшон  марҳилаи ниҳоии машқҳои муштараки амалиётӣ-стратегии зиддитеррористӣ  бо ташкили машқҳои баталиёнӣ-тактикӣ  ҷамъбаст ва натиҷагирӣ карда шуданд.  Тавре  дар ин бора сардори  маркази матбуоти  Вазорати мудофиаи Ҷумҳурии Тоҷикистон,  подполковник Ориф Нозимиён  ба АМИТ «Ховар» иттилоъ дод, баҳри назорат аз болои амалиёти муштараки ҷузъу томҳо Вазири мудофиаи ҷумҳурӣ  Шералӣ Мирзо, намояндагони Артиши Ҷумҳурии Мардумии Чин, Раиси Вилояти Мухтори Кӯҳистони Бадахшон  ва дигар масъулини мақомоти иҷроияи ҳокимияти давлатии ин минтақа  ва дигар шахсони расмӣ дар  машқҳои муштарак иштирок намуданд.

Ба зикри номбурда, дар тамрингоҳи Ҷелондӣ ҷузъу томҳои пиёданизоми Қувваҳои мусаллаҳи Ҷумҳурии Тоҷикистон ва Артиши озодихоҳи Ҷумҳурии Мардумии Чин бо истифодаи техникаҳои ҳарбии вазнини  зиреҳпӯши ҷангиву артиллерӣ, чархболҳои ҳарбӣ, техникаҳои гуногуни автомобилӣ ва дигар силоҳу муҳимоти мухталифи  ҳозиразамони ҳарбӣ  ба сӯи ҳадафҳои ниҳоӣ, ки таҷассумгари душманони шартӣ буданд, оташи шадид равон карданд. Дар машқгоҳи муштараки баталёнӣ- тактикӣ техникаҳои зиреҳпӯши ҷангиву артиллерӣ, авиатсияи мухталифи ҳарбӣ аз ду ҷониб  истифода шуданд. Инчунин аз рӯи пешгирӣ намудани убури ғайриқонунии марз, дастгиру безарар гардонидани афроди сарҳадшикан, торумор намудани душманони шартӣ дар шароити дашту саҳро, мавзеъҳои стратегӣ ва роҳҳои душворгузари ҷумҳурӣ амалиёт доир намуданд.

Зимни натиҷагирӣ аз даври ниҳоии машқҳои муштараки баталёнӣ- тактикӣ  вобаста бо дастуру супоришҳои Асосгузори сулҳу ваҳдати миллӣ, Пешвои миллат, Сарфармондеҳи Олии Қувваҳои мусаллаҳи Ҷумҳурии Тоҷикистон, Генерали артиш  Эмомалӣ Раҳмон   дар самти сиёсати дифоии мамлакат, омодагӣ баҳри пешгирӣ аз таҳдиди хатарҳо ва роҷеъ  ба сатҳи боз ҳам баланд бардоштани иқтидори мудофиавии давлат Вазири мудофиа Шералӣ Мирзо дар назди иштирокчиёни машқҳои низомӣ ибрози андеша кард.

Раиси Вилояти Мухтори Кӯҳистони Бадахшон  ва намояндагони Артиши озодихоҳи   Ҷумҳурии Мардумии Чин моҳият ва ҳадафи баргузории чунин тамринҳои васеи низомиро  барои таъмини амнияти  давлату миллат  саривақтӣ ва манфиатбахш арзёбӣ намуданд.

Ҳамзамон вобаста  ба  ҳамкории мутақобилан судманди  низомиёни Тоҷикистону Чин доир ба ташкилу ба роҳ мондани тамринҳои васеи низомӣ ва саҳмгузорӣ дар муборизаи муштараки зиддитеррористӣ  изҳори қаноатмандӣ карда шуд. Дар охир  фаъолони  машқҳои муштараки амалиётӣ-стратегии  зиддитеррористӣ бо медалу ифтихорнома, рутбаҳои навбатии ҳарбӣ   ва дигар  туҳфаҳои хотиравӣ сарфароз гардонида шуданд.

Ёдовар мешавем, ки машқҳои муҳими низомӣ дар 3 марҳила ба таври назариявию  амалӣ доир гардиданд. Марҳилаи аввали он  тибқи талаботи машқҳо 12 августи соли  равон бо  тамоми қувваю воситаҳои гарнизони Хоруғ ва мусаллаҳу муҷаҳҳаз бо техникаву лавозимоти ҳарбӣ   бо ишораи бонги хатари ҷангӣ бардошта шуд.

Ҷараёни баргузории машқҳои муштараки ҳарбӣ аз ҷониби ситоди  генералии Қувваҳои мусаллаҳ идора гардида,  рафти ҳама марҳилаҳои размоиши  низомӣ таҳти назорати қатъии роҳбарияти Вазорати мудофиаи мамлакат  қарор гирифт.

Тибқи  талаботи ишораи ҷангӣ  дар марҳилаи дуюм ва сеюми машқҳо раисони шаҳру ноҳияҳои Вилояти Мухтори Кӯҳистони Бадахшон, роҳбарони аввали сохторҳои қудративу давлатии мақомоти ҳифзи ҳуқуқи ин гарнизон, шаҳрвандони  дар қайди комиссариатҳои ҳарбӣ буда, техникаҳои хоҷагии халқ  ва дигар лавозимоти зарурӣ ба ҷамъомади мудофиаи ҳудудӣ ва машғулиятҳои омодагӣ- сафарбарӣ ҷалб карда шуданд.

Дар машқгоҳҳои ҳудуди шаҳру ноҳияҳои Вилояти Мухтори Кӯҳистони Бадахшон иштирокчиёни ҷамъомад  ба тирпарронӣ ва омӯзиши дигар машқҳое, ки  ба ин чорабинии муҳими сиёсӣ заруранд, фаро гирифта шуданд.

Дар даврони истиқлолияти Ҷумҳурии  Тоҷикистон бори 3-юм аст, ки миёни низомиёни Ҷумҳурии Тоҷикистону Артиши Ҷумҳурии Мардумии Чин машқҳои васеи низомӣ  бо ҷалби қувваю воситаҳои дуҷониба дар сатҳи зарурӣ  ва мувофиқ ба талаботи ҳарбӣ  ташкил ва ба роҳ монда мешаванд.

Август 14, 2019 15:45

Хабарҳои дигари ин бахш

Ҷавонон бояд қарзи шаҳрвандӣ — таҳсили илму дониш ва саҳмгузорӣ дар пешрафти Ватанро софдилона иҷро намоянд
Тоҷикистон дар мубориза бо қочоқ ва муомилоти ғайриқонунии маводи нашъаовар нақши калидӣ дорад
Ҳайати Тоҷикистон дар чорабиниҳои канорӣ дар доираи иҷлосияи 67-уми Комиссияи Созмони Милали Муттаҳид оид ба воситаҳои нашъадор иштирок намуд
Дар Вена ҳамкории Тоҷикистон бо Чин ва Эрон дар мубориза бо муомилоти ғайриқонунии маводи нашъадор баррасӣ шуд
Ҷаласаи гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон баргузор гардид
Ҳайати Тоҷикистон дар чорабинии канории Қазоқистон дар Вена иштирок намуд
Дар Вена оид ба сиёсати зиддимухаддиротии Ҷумҳурии Тоҷикистон маълумот дода шуд
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир гардид
Тарбияи ватандӯстӣ — омили муттаҳидии миллат дар мубориза бар зидди ифротгароӣ ва хурофотпарастӣ
Ҳайати Тоҷикистон дар иҷлосияи 67-уми Комиссияи Созмони Милали Муттаҳид оид ба воситаҳои нашъадор дар Вена иштирок дорад
14 МАРТ-ИДИ КАСБИИ КОРМАНДОНИ ПРОКУРАТУРА. Давоми 32 сол фаъолияти ин ниҳоди давлатӣ ба таври назаррас тақвият ёфт
Эмомалӣ Раҳмон: «Хурофот хатарест, ки ба имрӯзу ояндаи Тоҷикистон ва минтақа таҳдиди ҷиддӣ дорад»