Сарвари давлат Эмомалӣ Раҳмон бо ҷараёни нашъунамои майдони картошка дар хоҷагии деҳқонии «Роғ»-и Кӯҳистони Мастчоҳ шинос шуданд

Август 20, 2019 13:59

ДУШАНБЕ, 20.08.2019 /АМИТ «Ховар»/. Дар доираи сафари корӣ ба ноҳияи Кӯҳистони Мастчоҳ Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар хоҷагии деҳқонии «Роғ» бо фаъолияти кишоварзон шинос шуда, аз ҷараёни нашъунамои картошка дидан намуданд.

Тавре иттилоъ дода шуд, масоҳати заминҳои корам дар хоҷагии деҳқонии «Роғ»-и ноҳияи Кӯҳистони Мастчоҳ ба 124,2 гектар баробар буда, аз ин ҳисоб 102 гектар ба кишти картошка рост меояд. Деҳқонони хоҷагӣ пайваста барои ба даст овардани ҳосили дилхоҳ талош карда, дар парвариш ва захираи ин намуди маҳсулоти кишоварзӣ аз роҳу услуҳои нав ва тухмиҳои хушсифат истифода мебаранд. Феълан дар хоҷагии деҳқонии «Роғ» навъҳои гуногуни картошка, аз қабили «Тоҷикистон», «Бик Роза», «Алладин», «Пикасо» ва ғайра парвариш карда мешаванд.

Ба Пешвои миллат иттилоъ доданд, ки соли гузашта кишоварзони хоҷагии деҳқонии «Роғ» аз ҳар гектар замин аз 250 то 300-сентнерӣ ҳосил ба даст оварда буданд. Имсол вобаста ба мусоид омадани вазъи ҳаво дурнамои ҳосил аз ҳар гектар то 350- сентнерӣ аст.

Деҳқонон барои нигаҳдории картошка аз чағора-анбори зеризаминӣ истифода мебаранд. Танҳо дар хоҷагии деҳқонии «Роғ»-и ноҳияи Кӯҳистони Мастчоҳ 205 адад чунин анборҳои зеризаминӣ мавҷуд буда, ғунҷоиши ҳар яке аз онҳо аз 8 то 25 тоннаро дар бар мегирад. Мувофиқи иттилои мутахассисони Академияи илмҳои кишоварзии Тоҷикистон чунин анборҳои зеризаминӣ имкон медиҳанд, ки картошка дар ҳолати хуб нигаҳдорӣ шуда, тару тоза ва босифат ба бозорҳои ҷумҳурӣ бароварда шавад.

Зимни шиносоӣ бо фаъолияти кишоварзон ва нашъунамои картошка дар деҳаи «Роғ» Президенти Ҷумҳурии Тоҷикистон муҳтарам Эмомалӣ Раҳмон масъулони ноҳиявию ҷумҳуриявиро вазифадор сохтанд, ки аз ҳар ваҷаб замин самаранок истифода бурда, сол аз сол масоҳати заминҳои корамро васеъ гардонанд. Зеро фаровонии бозорҳои ҷумҳурӣ, хони пурнозу неъмати сокинон ва ниҳоят татбиқи яке аз ҳадафҳои асосии давлат ва Ҳукумати мамлакат — таъмини амнияти озуқаворӣ маҳз аз фаъолияти пурсамари кишоварзон вобаста аст.

Бояд гуфт, ки бо супориши Сарвари давлат дар деҳаи Роғ Маркази хизматрасонии техникаи кишоварзӣ фаъолият дошта, хоҷагидоронро бо тамоми техникаи кишоварзӣ, аз ҷумла таҷҳизот барои ҷамъоварии картошка ва қисмҳои эҳтиётӣ таъмин мекунад. Маркази техникӣ, ки аз ҷониби КВД ҷумҳуриявии «Тоҷикагролизинг» сохта ба истифода дода шудааст, талаботи хоҷагиҳои деҳқониро дар ноҳияи Кӯҳистони Мастчоҳ ба пуррагӣ қонеъ мегардонад.

Боздид аз рафти нашъунамои майдони картошка дар хоҷагии деҳқонии "Роғ"-и Кӯҳистони Мастчоҳ 20.08.2019

Август 20, 2019 13:59

Хабарҳои дигари ин бахш

Сарвари давлат Эмомалӣ Раҳмон дар Рӯзи дониш ва дарси сулҳ иштирок намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон ба муносибати Рӯзи дониш ва Дарси сулҳ
Эмомалӣ Раҳмон: Дӯстӣ ва ҳамкории Тоҷикистону Чин дар сухан не, дар амал аст
Шарҳи Амри Президенти Ҷумҳурии Тоҷикистон
Амри Президенти Ҷумҳурии Тоҷикистон
Маҷлиси Ҳукумати Ҷумҳурии Тоҷикистон баргузор шуд
Пешвои миллат Эмомалӣ Раҳмон Муовини сарвазир, Вазири корҳои хориҷии Ҷумҳурии Қазоқистон Мурат Нуртлеуро ба ҳузур пазируфтанд
Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Корея Ли Чжэ Мён суҳбати телефонӣ анҷом доданд
Сарвари давлат Эмомалӣ Раҳмон ба намояндагони сохторҳои қудратӣ ва низомӣ мукофотҳои давлатӣ ва унвону рутбаҳои махсус супориданд
Суханронии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар вохӯрӣ бо бунёдгарони НБО «Роғун»
Пешвои миллат Эмомалӣ Раҳмон бо кормандони НБО «Роғун» ва фаъолони шаҳри Роғун мулоқот намуданд
Сарвари давлат Эмомалӣ Раҳмон дар НБО «Роғун» бо ҷараёни корҳои сохтмонӣ дар нақби сохтмонии қабати чорум шинос шуданд