Дар шаҳри Бӯстон иштирокдорони конфронси назариявӣ имкониятҳои сайёҳии Тоҷикистонро баррасӣ карданд

БӮСТОН, 26.09.2019. /АМИТ «Ховар»/. 25 сентябр бо ташаббуси мақомоти иҷроияи ҳокимияти давлатии шаҳри Бӯстон бахшида ба Солҳои рушди деҳот, сайёҳӣ ва ҳунарҳои мардумӣ ва Рӯзи умумиҷаҳонии  сайёҳӣ, ки ҳамасола 27 сентябр таҷлил мегардад, дар Донишкадаи кӯҳӣ-металлургии Тоҷикистон конфронси назариявӣ таҳти унвони «Тоҷикистон – кишвари сайёҳӣ» доир гардид. Дар он масъулини мақомоти иҷроияи ҳокимияти давлатии шаҳри Бӯстон, роҳбарони меҳмонхонаҳо ва намояндагони дигар ширкатҳои сайёҳӣ иштирок ва мубодилаи афкор намуданд.

Дар конфронс муовини раиси шаҳри Бӯстон Хуршед Сатторзода оид ба имкониятҳои сайёҳии мамлакат, заминаи мусоид баҳри рушди соҳа ва иқдомҳои наҷиби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёдовар гардид. Номбурда зикр кард, ки  дар ҷумҳурӣ  мақомоти салоҳиятдори бахши сайёҳӣ – Кумитаи рушди сайёҳии назди Ҳукумати  Ҷумҳурии Тоҷикистон таъсис дода шуда, аз ҷониби Ҳукумати Ҷумҳурии Тоҷикистон «Стратегияи рушди сайёҳӣ барои давраи то соли 2030»  тасдиқ гардидааст. Ҳамзамон аз ҷониби Парлумон як зумра санаду қонунҳои танзимкунандаи соҳаи сайёҳии мамлакат қабул гардиданд.

Таъкид  шуд, ки дар Ҷумҳурии Тоҷикистон бо мақсади  рушди соҳа 180 ширкати сайёҳӣ фаъолияти густурда дошта, нақши онҳо дар муаррифии иқтидори сайёҳӣ ва ташаккули  бахши туризм дар мамлакат муассир мебошад.

Дар кори конфронс директори Ассотсиатсияи тараққиёти сайёҳии «Зарафшон» Ҷамшед Юсупов дар мавзӯи «Иқтидори сайёҳии вилояти Суғд», муовини ректори Донишкадаи кӯҳӣ-металлургии Тоҷикистон оид ба илм, инноватсия ва робитаҳои байналмилалӣ Замониддин Насриддинов дар мавзӯи «Имкониятҳои сайёҳии шаҳри Бӯстон» ва роҳбари ширкати сайёҳии «Чимтарға – Travel»  Оламафрӯз Раҳмонқулов дар мавзӯи «Таҷрибаи қабули сайёҳон ба Тоҷикистон»  маърӯза карданд.