Тоҷикистон ва Иттиҳоди Аврупо ҷиҳати пешгирӣ ва бартарафсозии оқибатҳои офатҳои табиӣ ҳамкориро тақвият мебахшанд

ДУШАНБЕ, 18.09.2019. /АМИТ«Ховар»/. Ҷумҳурии  Тоҷикистон ва Иттиҳоди Аврупо ҷиҳати  пешгирӣ ва бартарафсозии оқибатҳои офатҳои табиӣ ҳамкориро тақвият мебахшанд.

Тавре имрӯз аз Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба АМИТ «Ховар» хабар доданд, масъалаи мазкур зимни мулоқоти Раиси Кумита генерал-лейтенант Рустам Назарзода ва Намояндаи махсуси Иттиҳоди Аврупо дар Осиёи Марказӣ Петер Буриан муҳокима шуд.

Зикр шуд, ки тағйири иқлим сабаби афзоиши ҳамарӯзии ҳолатҳои фавқулода гардида, инчунин боиси захмӣ шудан ва ба ҳалокат расидани шаҳрвандони осоишта мегардад. «Аз ин рӯ Иттиҳоди Аврупо омода аст дар ҳалли ин масоил ва коҳиши хатари офатҳо ба Тоҷикистон кумаки зарурӣ расонад», -афзуд манбаъ.

Ҷонибҳо оид ба роҳҳои таҳкими ҳамкории минбаъда дар доираи лоиҳаҳои мавҷуда, омӯзиш ва бозомӯзии кадрҳо, масъалаҳои огоҳиҳои аҳолӣ, омода намудани мутахассисони  соҳавӣ ба офатҳои табиӣ табодули афкор карданд.

Петер Буриан  иброз дошт, ки Иттиҳоди Аврупо ба ҳамкорӣ бо Ҷумҳурии Тоҷикистон, махсусан дар масъалаи коҳиш додани хатари офатҳои табиӣ диққати ҷиддӣ медиҳад.