Дар 9 моҳи соли равон дар Маркази миллии илмии пайвандсозии узв ва бофтаҳои инсон 685 амалиёт гузаронида шуд

ДУШАНБЕ, 15.10.2019. /АМИТ «Ховар»/. Дар 9 моҳи соли равон дар Маркази миллии илмии пайвандсозии узв ва бофтаҳои инсон дар зиёда аз 644 нафар бемор амалиёти пайвандсозии гурда ва 41 нафар ҷарроҳии пайвандсозии ҷигар гузаронида шуд.

Тавре АМИТ «Ховар» бо истинод ба маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар медиҳад, дар ин бора имрӯз, 15 октябр зимни ҷаласаи ҳайати мушовара оид ба фаъолияти 9-моҳаи ин ниҳод иттилоъ дода шуд.

Ба иттилои манбаъ, дар Маркази миллии илмии пайвандсозии узв ва бофтаҳои инсон, ки  соли 2011 таъсис ёфтааст, то имрӯз 122 нафар шаҳрвандони хориҷӣ амалиёти пайвандсозии узвҳояшонро гузаронидаанд.

«Аз ин шумора 29  нафар аз Озарбойҷон, 41 нафар аз Қирғизистон, 31 нафар аз Исроил ва боқӣ аз дигар давлатҳои хориҷи дуру наздик мебошанд», — омадааст дар иттилоияи Вазорат.

Гуфта мешавад, ки ҷиҳати коҳиш додани шумораи нафароне, ки ба хориҷи мамлакат барои ташхис ва табобат сафар мекунанд, дар заминаи Маркази мазкур шуъбаи пайвандсозии мағзи устухон фаъолият дошта, то имрӯз ба 10 нафар бемор амалиёти пайвадсозии мағзи устухон гузаронида шудааст.

Дар ҷаласа масъалаҳои марбут ба татбиқи барномаву стратегияҳои соҳавии давлатӣ баррасӣ гардида, Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода масъулинро барои иҷрои саривақтии супоришҳои ҷойдошта вазифадор намуд.