Дар Душанбе таҳти унвони «Дастовардҳо ва дурнамои кинои тоҷик» конференсияи илмӣ гузаронида шуд

Октябрь 29, 2019 13:55

ДУШАНБЕ, 29.10.2019. /АМИТ «Ховар»/. 29 октябр дар Пажӯҳишгоҳи илмӣ-тадқиқотии фарҳанг ва иттилооти Вазорати фарҳанги Ҷумҳурии Тоҷикистон ба ифтихори 90-солагии кинои тоҷик дар мавзӯи «Дастовардҳо ва дурнамои кинои тоҷик» конференсияи илмӣ баргузор гардид.

Ҳамоишро директори Пажӯҳишгоҳи мазкур Шариф Комилзода ифтитоҳ намуда, иброз дошт, ки «нақши кинои тоҷик дар рушду нумуи мамлакат хеле назарас мебошад. Ҳадафи асосии кинои тоҷик- ин таблиғи ғояҳои миллӣ, тарбияи зебоипарастӣ ва ҳифзи мероси таърихиву фарҳангӣ ҷиҳати таҳияи асарҳои нави саҳнавӣ ва филмномаҳои таърихӣ мебошад».

Ходими калони илмии Пажӯҳишгоҳи мазкур Тиллои Некқадам оид ба «Чашмандозе ба таърихи кинои тоҷик ва вижагиҳои ҳунари поягузорони он» маърӯза намуд.

Мавсуф иброз дошт, ки «аввалин маротиба 16 октябри соли 1929 нахустин киножурнал дар бораи омадани аввалин қатора ба Душанбе намоиш дода шуд. Ҳамин тавр, зангӯлаи омадани аввалин қатора ба Тоҷикистон аз милоди кинои тоҷик мужда медод ва инак ба он рӯзи таърихӣ 90 сол пур гардид. Дар тӯли ин солҳо  кинои тоҷик ҳамчун намунаи фарҳанги миллӣ дар ташаккулу таҳкими тафаккури миллат бо паймудани марҳилаҳои гуногун саҳми арзанда гузошт ва имрӯз низ ҳамин рисолатро бар дӯш дорад».

Бояд тазаккур дод, ки  кинои тоҷик имрӯз омили эҳё намудани таъриху маданияти қадимии халқи тоҷик ва инъикосгари масири пешрафти рушди давлат ба ҳисоб меравад.

Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон зимни ифтитоҳи ТВ «Синамо» 1 марти соли 2016 махсус таъкид карда буданд: «Вақти он расидааст, ки филмҳои дарбаргиранда ва ифодагари арзишҳои неку созандаи миллӣ наворбардорӣ шуда, дар онҳо таъриху фарҳанг ва пешрафту дастовардҳои Тоҷикистони соҳибистиқлол инъикос гарданд ва ба ҳамин васила пеши роҳи бозори филмҳои таҳмилии дорои хислат ва мазмуни фаҳшу зӯроварӣ ва таблиғи арзишҳои барои мо бегона гирифта шавад».

Сипас мудири шуъбаи фарҳанг ва санъатшиносӣ Фарзон Назрӣ дар бораи нақши Марат Орипов дар филми «Қисмати шоир», мудири бахши фарҳанги моддӣ Лайло Носирзода дар мавзӯи «Образи зан дар кинои тоҷик», ходими калони илмӣ Гулҳаё Мадимарова дар барои филми «Ман бо духтаре вохӯрдам» ва шуҳрати суруди «Дидам ҷамоле»,  ходими калони илмӣ Акобир Абдуллозода дар мавзӯи «Нахустин филм аз рӯи достони «Шоҳнома»-и Абулқосим Фирдавсӣ» маърӯза намуданд.

Дар конфронс ҳамчунин китоби ходими калони илмии Пажӯҳишгоҳи илмӣ-тадқиқотии фарҳанг ва иттилоот Тиллои Некқадам «Бозтоби чеҳраҳои дурахшони кино», ки соли равон нашр гардидааст, муаррифӣ гардид.

Дар китоби мазкур муаллиф оид ба таблиғи ҳамкории адибон бо коргардонҳои кино, тарбияи зебоипарастии наврасону ҷавонон ва таҳияи филмҳои баланди бадеӣ дар бораи  бузургони миллати мо сухан гуфтааст. Китоб аз ҳафт боб иборат буда, хонандагонро бо лаҳзаҳои ҷудогонаи ҳамкории устодон Садриддин Айнӣ ва Мирзо Турунзода, ки аз солҳои сиюм оғоз ёфтааст, шинос мекунад.

Октябрь 29, 2019 13:55

Хабарҳои дигари ин бахш

«МАНЗАРНИГОР». Таҳти чунин унвон дар Осорхонаи миллии Тоҷикистон намоиш ифтитоҳ гардид
Нашриёти «Адиб» якчанд китобчаҳои бачагонаро ба нашр расонид
Дар Душанбе намоиш-фурӯши китобчаҳои кӯдакона доир гардид
«Маориф ва илм. Инъикос ва баррасии муҳимтарин масоили иҷтимоӣ дар паёмҳои Пешвои миллат», — шарҳи матбуоти даврии Тоҷикистон
Скрипканавози турк Ҷиҳат Ашкин дар Тоҷикистон барномаи ҳунарӣ баргузор мекунад
Ҳунармандони Сирки давлатии Тоҷикистон ба Туркия ва Покистон сафар намуданд
Дар вилояти Хатлон мониторинги барномаҳои соҳавӣ гузаронида шуд
Дар Коллеҷи тиббии Ваҳдат даври шаҳрии озмуни «Фурӯғи субҳи доноӣ китоб аст» ҷараён дорад
Ансамбли давлатии рақсии «Зебо» барои иштирок дар Фестивали байналмилалии «Рақси лазгӣ» ба Тошканд сафар намуд
Дар Донишгоҳи давлатии Хоруғ бахшида ба 30-солагии таъсиси он озмун оғоз гардид
«Душанбе. Шаҳре, ки шукӯҳи давлат ва симои миллатро таҷассум мекунад», — шарҳи матбуоти даврии Тоҷикистон
Филми кӯтоҳи «Этюд» дар Фестивали 45-уми байналмилалии Гризлони Олмон иштирок мекунад