Пешвои миллат Эмомалӣ Раҳмон: Аҳли олам моро бо номи «тоҷикон», давлатамонро «Тоҷикистон» ва забонамонро «забони тоҷикӣ» мешиносанду эътироф мекунанд

ДУШАНБЕ, 04.10.2019. /АМИТ «Ховар»/.  Имрўз аҳли олам моро бо номи «тоҷикон», давлатамонро бо номи «Тоҷикистон» ва забонамонро бо номи «забони тоҷикӣ» мешиносанду эътироф мекунанд. Ин нуктаро  Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз зимни суханронӣ ба муносибати Рӯзи забони давлатии Ҷумҳурии Тоҷикистон изҳор доштанд.

Пешвои миллат тазаккур доданд, ки бо ин забон садҳо ва ҳазорон бузургмардону нобиғагон дурри сухан суфтаанд ва осори безаволу мондагор ба ояндагон мерос гузоштаанд.

«Ҳикмат ва ахлоқи инсонпарварӣ, ки ҷавҳари осори ниёгони мост, бо забони муқтадиру пурвусъат ва ширину гуворои тоҷикӣ асрҳо боз садо медиҳад ва сарвати фарҳангиву маънавии миллати мо бо ҳамин забон оламро тасхир кардааст. Осори Рўдакиву Фирдавсӣ, Аттору Саноӣ, Саъдиву Ҳофиз, Мавлонои Балхиву Мавлоно Ҷомӣ ва садҳо нафари дигар, ки ҳанўз чандин аср пеш навишта шудаанд, имрўз барои мардуми мо дастрасу фаҳмо ва азизу гиромӣ мебошад. Ин осори ҷовидонаро ҳар як фарзанди соҳибмаърифати миллат имрўз ба осонӣ ва бе луғат мехонаду мефаҳмад», — илова намуданд Сарвари давлат.