Тоҷикистон ба ҳамкории мутақобила дар чаҳорчӯби САҲА аҳамияти хосса медиҳад
ДУШАНБЕ, 08.10.2019 /АМИТ «Ховар»/. 7 октябр гурӯҳи 16-нафараи сафирони кишварҳои иштироккунандаи САҲА дар чаҳорчӯби сафари худ ба Осиёи Марказӣ аз Ҷумҳурии Тоҷикистон боздид намуд.
Тавре АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад, барномаи васеи сафари сафирон дар Тоҷикистон аз вохӯрӣ бо Сарвазири мамлакат Қоҳир Расулзода оғоз ёфт. Қ. Расулзода меҳмононро ба Тоҷикистон хайрамақдам гуфта, изҳор дошт, ки сафари мазкур далели рағбат ва майли муштарак барои ноил шудан ба ҳадафҳои САҲА дар таъмини сулҳу субот дар паҳнои васеи Созмон мебошад.
Дар нимаи якуми рӯз гурӯҳи сафиронро инчунин Вазири корҳои хориҷии Тоҷикистон Сироҷиддин Муҳриддин ба ҳузур пазируфт. Дар ҷараёни вохӯрӣ С. Муҳриддин таъкид кард, ки Тоҷикистон ба ҳамкории мутақобила дар чаҳорчӯби САҲА ва таъмиқи онҳо дар се самти фаъолияти Созмон аҳаммияти хосса медиҳад.
Дар вохӯрӣ табодули афкори амиқ оид ба чолишу таҳдидҳое, ки САҲА ва иштирокчиёни он ба онҳо дучоранд, сурат гирифт.
Сафирон ба тадбирҳои Ҳукумати Тоҷикистон ҷиҳати ба ҳам овардани тадбирҳои байналмилалӣ бо мақсади муқовимат бар зидди терроризм ва маблағгузории он дар минтақаи Осиёи Марказӣ, пеш аз ҳама, дар чаҳорчӯби чорабиниҳои сатҳи баланди «раванди Душанбе» баҳои баланд доданд. Ғайр аз ин, сафирон натиҷаҳои раёсати Тоҷикистонро дар Форуми ҳамкории амниятии САҲА дар соли равон сутуданд.
Дар ҳошияи сафари сафирон дар мавзӯи «Муқовимат ба терроризм, ифротгароӣ ва гардиши ғайриқонунии маводи мухаддир» суҳбати «мизи мудаввар» баргузор гардид. Ҳамоиши мазкур имкон фароҳам овард, ки муҳокимаи мавзӯи тадбирҳои андешидашуда ва саҳми Тоҷикистон дар амалисозии рӯзномаи ҷории САҲА идома дода шавад.
Дар чаҳорчӯби ҳамоиш намояндагони Вазорати корҳои дохилӣ, Прокуратураи генералӣ, Кумитаи давлатии амнияти миллӣ, Агентии назорати маводи нашъаовар ва Маркази тадқиқоти стратегии назди Президенти Ҷумҳурии Тоҷикистон сухан гуфтанд.
Барномаи сафари гурӯҳи сафирон инчунин боздид аз Маркази навтаъсиси омӯзишӣ доир ба минаҳои назди Вазорати мудофиаи Тоҷикистон ва қароргоҳи Агентии назорати маводи нашъаовари назди Президенти Ҷумҳурии Тоҷикистонро дар бар гирифт. Сафирон бо фаъолияти амалии ин муассисаҳо ҷиҳати минарӯбӣ, нобуд кардани аслиҳаи одӣ ва инчунин анҷом додани амалиёт оид ба муқовимат зидди гардиши ғайриқонунии маводи нашъаовар ва қочоқи он шинос шуданд.
Пас аз анҷоми сафари корӣ гурӯҳи сафирон аз Дафтари барномаҳои САҲА дар шаҳри Душанбе дидан карда, зимни он бо фаъолияти Коллеҷи сарҳадии САҲА ба муносибати ҷашни 10-солагии фаъолияташ шинос шуд ва инчунин бо намояндагони ҷомеаи шаҳрвандӣ ва ҷавонони Тоҷикистон вохӯрӣ барпо кард.
Ҳайати меҳмонон аз сафирони Словакия (кишвари дар САҲА раисикунанда), Италия (ҳамоҳангсози гурӯҳ), Австрия, Афғонистон, Белгия, Исландия, Испания, Португалия, Россия, Сербия, Тоҷикистон, Ӯзбекистон, Черногория, Шветсия, Эстония, Иттиҳоди Аврупо ва инчунин намояндагони Марказ оид ба пешгирии низоъҳои Котиботи САҲА иборат буд.
АКС: ВКХ ҶТ








Рӯзи Президенти Ҷумҳурии Тоҷикистон ва 15-солагии ифтитоҳи бинои Сафорат дар шаҳри Берлин таҷлил гардид
Сарвазири Покистон бо Вазири корҳои хориҷии Тоҷикистон вохӯрӣ намуд
Ҳайати Тоҷикистон дар ҷаласаи вазирони корҳои хориҷии Созмони ҳамкории иқтисодӣ иштирок намуд
Сафири Тоҷикистон бо Мудири кулли идораи амлок ва абнияи вазорати корҳои хориҷии Эрон вохӯрӣ намуд
Дар Сеул Рӯзи Президенти Ҷумҳурии Тоҷикистон таҷлил карда шуд
Сафири Тоҷикистон бо сардабири маҷаллаи фарҳангии «Ал-Арабӣ»-и Кувайт вохӯрӣ намуд
Дар Москва Рӯзи Президенти Ҷумҳурии Тоҷикистон таҷлил карда шуд
Дар Ашқобод Рӯзи Президенти Ҷумҳурии Тоҷикистон таҷлил карда шуд
Намояндаи Тоҷикистон дар ҷаласаи 53-юми Гурӯҳи кории Шарҳи универсалии даврии Шурои ҳуқуқи инсони СММ иштирок намуд
Барқарор намудани ҳамкорӣ байни вилоятҳои Тоҷикистону Кувайт баррасӣ гардид
Дар Душанбе машваратҳои сиёсӣ байни Тоҷикистону Олмон баргузор гардиданд
Дар Екатеринбург бахшида ба санаҳои муҳими давлатӣ ва таърихии Тоҷикистон чорабинии тантанавӣ баргузор шуд






