Вазири корҳои дохилӣ бо фаъолон ва сокинони минтақаи Рашт мулоқот намуд

ДУШАНБЕ, 19.10.2019 /АМИТ «Ховар»/. 18 октябр дар доираи сафари хизматӣ ба ноҳияи Рашт ва баргузории ҷаласаи сайёр оид ба ҷамъбасти фаъолияти мақомоти корҳои дохилӣ дар давоми нуҳ моҳ вохӯрии Вазири корҳои дохилии Ҷумҳурии Тоҷикистон, генерал-полковники милитсия Рамазон Раҳимзода бо фаъолон ва сокинони минтақаи Рашт баргузор гардид.

Зимни мулоқот Вазири корҳои дохилӣ оид ба пешрафту тараққиёти минтақаи Рашт дар ҳамаи соҳаҳои иҷтимоию иқтисодӣ ва хоҷагии халқ, корҳои ободонию созандагӣ, инчунин ташаббусҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар арсаи байналмилалӣ ибрози андеша намуд.

Мардуми сарбаланди ноҳияи Рашт аз дастгирию ғамхориҳо ва таваҷҷуҳи рӯзафзуни Сарвари давлат изҳори миннатдорӣ намуданд.

Дар хотимаи вохӯрӣ бо иштироки ансамбли «Сипар»-и Вазорати корҳои дохилӣ ва дигар ҳунармандон барномаи ҳунарӣ пешкаши ҳозирин гардонида шуд.